АҒАШ ПЕН ГҮЛ КӨШЕТІН ӨСІРЕТІН ЖАҢА ТҰҚЫМБАҚ САЛЫНДЫ
Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» жалпыұлттық бағдарламасы аясында елді мекендерді көгалдандыру, аймақтың экологиялық ахуалын сауықтыру және жасыл желек аумағын еселеп арттыру жөніндегі стратегиялық тапсырмалар Түркістан облысында жүйелі түрде жүзеге асырылып келеді. Осы бағыттағы ауқымды бастамалардың заңды жалғасы ретінде Түркістан қаласында заманауи үлгідегі жаңа тұқымбақ бой көтеріп, ондағы жылыжай кешендерін кеңейту жұмыстары қарқынды басталып кетті.
Түркістан облысының әкімі Нұралхан Көшеров облыс орталығында іске қосылған жаңа тұқымбақтың тыныс-тіршілігімен арнайы барып танысып, жобаны одан әрі дамытудың келешек жоспарларын егжей-тегжейлі саралады. Өңір басшысы аралау барысында тұқымбақтың өндірістік әлеуетін мейлінше арттыру, инфрақұрылым жүйелерін жетілдіру және өңірді көгалдандыруға ауадай қажетті сапалы көшеттер мен әсем гүлдердің көлемін ұлғайту жөнінде жауапты азаматтарға нақты тапсырмалар жүктеді. Жиын барысында Мемлекет басшысының «Таза Қазақстан» бағдарламасы аясында жасыл алқапты көбейту туралы тапсырмасын тілге тиек еткен Нұралхан Көшеров бұл бағытта аймақта барлық мүмкіндіктердің жеткілікті екенін атап өтті. Өңір басшысы өз сөзінде осындай заманауи тұқымбақтарды тек облыс орталығында ғана емес, барлық аудан мен қалаларда ашып, тіпті еліміздің басқа да өңірлерін отандық көшеттермен қамтамасыз ету қажеттігін баса айтты. Бұдан бөлек, халық арасында ағартушылық және түсіндіру жұмыстарын үздіксіз жүргізудің маңыздылығына тоқталған ол, әрбір тұрғын өзінің ауласына ағаш егетін болса, жалпы экологиялық ахуалдың айтарлықтай жақсаратынына сенім білдірді. Соңғы сегіз жылдың бедерінде Түркістанның ауа райы оң жағына өзгеріп, аптап ыстықтың беті қайтып, температураның сәл де болса төмендегені бұған дейін атқарылған ауқымды көгалдандыру жұмыстарының нақты нәтижесі екенін мақтанышпен жеткізді.
Ауқымдылығымен дараланатын «Түркістан қаласы аумағындағы тұқымбақ» жобасының жалпы құны 400 миллион теңгені құрайды. Жалпы аумағы 10 гектар алқапты алып жатқан бұл маңызды нысанның құрылысы 2025 жылдың қазан айында басталған болатын. Жобаны күтіп ұстаушы әрі жауапты мекеме ретінде «SK Geokart» жауапкершілігі шектеулі серіктестігі белгіленген. Қысқа мерзім ішінде мұнда өндірілген гүлдер мен ағаш көшеттері өзінің алғашқы оң жемісін бере бастады. Алдағы межеде тұқымбақтың жылыжай аумағын одан әрі кеңейту, заманауи асфальт жолдарын төсеу, табиғи газ пен ауыз су желілерін толықтай тартып, инфрақұрылымды толық аяқтау жоспарланған. Сонымен қатар, Арыс-Түркістан су жүйесінің зор мүмкіндіктерін тиімді пайдалану және өсірілетін өсімдіктердің сапасы мен жерсінуін арнайы бақылау мақсатында заманауи зертхана құру да көзделген. Болашақта жаңа тұқымбақ өзінің толық өндірістік қуатына шыққан кезде мұнда жыл сайын 700 мың түп біржылдық гүл, 1 миллион түп жапырақты ағаш көшеті, 50 мың түп қылқанжапырақты ағаш және 100 мың түп көпжылдық гүл өсіріледі деп жоспарлануда. Осылайша өндірілген мол өнім Түркістан қаласы мен жалпы облыс аумағындағы саябақтарды, саяжолдарды, гүлзарлар мен қоғамдық кеңістіктерді көгалдандыруға пайдаланылып, аймақты толықтай жергілікті жерсіндірілген көшеттермен қамтамасыз ететін болады. Айта кетерлігі, Президенттің республика аумағына 15 миллион ағаш отырғызу жөніндегі ауқымды тапсырмасына сәйкес, биыл Түркістан облысында 1 миллионнан астам ағаш отырғызу жоспарланған болатын. Табиғаттың төлі оянған көктемгі маусымда аймақта 332 мыңнан астам жас көшет жерге отырғызылды. Аталған барлық көшеттер облыстағы 14 жергілікті тұқымбақта арнайы өсірілуде. Бұдан бөлек, жомарт инвесторлардың қолдауы мен демеушілігінің арқасында косымша 1 миллионнан астам ағаш отырғызылып, белгіленген меже артығымен орындалады деп күтілуде.
