ПЛАСТИК ҚАЛДЫҚТАРДЫ ҚАЙТА ӨҢДЕЙТІН ЗАМАНАУИ ЗАУЫТ САЛЫНЫП ЖАТЫР
Түркістан облысында соңғы жылдары өңдеу өнеркәсібін өркендетіп, шикізатқа бай өңірді дайын өнім өндіретін қуатты мекенге айналдыру бағытында кешенді жұмыстар қарқынды жүргізіліп келеді. Аймақта жаңа өндіріс орындарын ашу, жергілікті ресурстарды терең өңдеу және ішкі нарықты отандық өніммен қамтамасыз ету арқылы импортқа тәуелділікті барынша азайту басты басымдықтың біріне айналды. Осы орайда, облыс әкімі Нұралхан Көшеров Жетісай ауданына жасаған жұмыс сапары барысында өңірдің өндірістік әлеуетін арттыруға бағытталған бірқатар маңызды жобалардың барысымен танысып, құрылыс қарқынын пысықтады. Аудандағы индустриялық аймақта қазіргі таңда заманауи талаптарға сай келетін, қоршаған ортаны қорғауға әрі экономиканы ілгерілетуге септігін тигізетін маңызды нысан – пластик қалдықтарын қайта өңдеу және пластик ыдыстарын шығару зауыты бой көтеріп келеді.
Бұл маңызды жобаны «KAZ INVA» жауапкершілігі шектеулі серіктестігі жүзеге асыруда. Жобаның жалпы инвестициялық құны 2 миллиард теңгені құрайды. Қазіргі таңда құрылыс алаңында қызу жұмыс жүріп жатыр, ал жоспар бойынша құрылыс-монтаждау жұмыстары биылғы жылдың желтоқсан айында толық аяқталып, пайдалануға беріледі деп күтілуде. Өңір басшысы зауыт құрылысының басы-қасында болып, аудан әкімі мен тиісті сала жетекшілеріне берілген тапсырмалардың сапалы әрі белгіленген мерзімде орындалуын қатаң тапсырысты. Сапар барысында өңір басшысы Нұралхан Көшеров заманауи өндіріс орындарын ашудың стратегиялық маңызына арнайы тоқталып өтті. Өңір басшысы өз сөзінде Түркістан облысы үшін жаңа өндіріс орындарын ашу, шикізатты терең өңдеуді дамыту және сырттан келетін импортқа тәуелділікті азайту ең басты міндеттердің бірі екенін атап айтты. Ондай заманауи жобалар тек аймақтың экономикалық әлеуетін арттырып қана қоймайды, сонымен бірге экологиялық жағдайды жақсартуға, тұрғындарды тұрақты жұмыспен қамтуға және жалпы өңір дамуына соны серпін беруге мүмкіндік береді. Жаңадан іске қосылатын зауытта өңірден жиналған пластик қалдықтары сұрыпталып, қайта өңдеуден өтеді. Нәтижесінде ауыл шаруашылығы мен түрлі өндіріс салаларына ауадай қажетті сапалы пластик бұйымдары шығарылмақ. Бұл кәсіпорын толық қуатына көшкен кезде жергілікті 70 азамат тұрақты жұмыспен қамтылады деп жоспарлануда. Зауыттың өндірістік қуаты жылына 10 миллион дана өнім шығаруға есептелген. Мұндай ауқымды жобаның іске асуы өңдеу өнеркәсібінің өңір экономикасындағы үлесін едәуір арттырып, отандық шикізатты ысырапсыз, тиімді пайдалануға жол ашады.
Жетісай ауданындағы өндірістік өрлеу мұнымен шектелмейді. Мұнда жалпы аумағы 59 гектарды құрайтын үлкен индустриялық аймақ жұмыс істеп тұр. Осы аумақта жалпы құны 30,3 миллиард теңгені құрайтын 5 ірі зауыттың құрылысы қолға алынған болатын. Бүгінгі таңда олардың екеуі сәтті іске қосылып, өнім шығара бастаса, қалған үш зауыттың құрылыс-монтаждау жұмыстары қарқынды түрде жалғасуда. Осы жобалардың барлығы толыққанды жұмыс істей бастағанда, аудандағы мыңға жуық жергілікті тұрғын тұрақты жұмыс орнымен қамтамасыз етілетін болады. Оған қоса, өндірістік парк аумағында халыққа да, шаруаларға да өте қажетті әртүрлі бағыттағы 5 бірдей жоба жүзеге асырылып жатыр. Олардың қатарында заманауи жиһаз өндірісі, ауыл шаруашылығы техникаларына қажетті қосалқы бөлшектер шығару, құрама жем дайындау, сапалы темір бұйымдары мен тұрмыста жиі қолданылатын химиялық жуғыш заттар өндірісі бар. Бұл жобалар жергілікті нарықты арзан әрі сапалы отандық өніммен қамтамасыз етуге зор мүмкіндік береді.
Ауыл шаруашылығы дамыған Жетісай өңірінде аграрлық саланы қолдау да назардан тыс қалған жоқ. Өңірде өндіріспен қатар агрокешенді дамыту мақсатында құны 3,5 миллиард теңгені құрайтын «MIR AGRO KZ» жауапкершілігі шектеулі серіктестігінің заманауи жылыжай кешені мен өнімдерді сақтайтын ауқымды қоймасының құрылысы белсенді жүргізілуде. Бұл кешен аймақтағы азық-түлік қауіпсіздігін қамтамасыз етуге және өнімді жыл бойы сапалы сақтауға мүмкіндік береді. Жалпы, Түркістан облысында кейінгі жылдары отандық және шетелдік инвесторлар үшін өте қолайлы жағдайлар жасалып, барлық қажетті инфрақұрылым тартылып берілуде. Жұмысты жүйелеу мақсатында өңірде «Turan» арнайы экономикалық аймағы мен 21 индустриялық аймақ табысты жұмыс істеп тұр. Одан бөлек, облыстың барлық аудандары мен қалаларында шағын өнеркәсіптік парктер салынып, кәсіпкерлікті дамытуға, жаңа өндіріс орындарын ашуға жан-жақты мемлекеттік қолдау көрсетілуде.
