«ТАЗА ҚАЗАҚСТАН» БАҒДАРЛАМАСЫ АЯСЫНДА АУҚЫМДЫ ТАЗАЛЫҚ ЖҰМЫСТАРЫ ӨТТІ
Шымкент қаласында Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» экологиялық бағдарламасы аясында ауқымды сенбілік ұйымдастырылды. Бұл шара тек қала көшелерін күл-қоқыстан арылтып қана қоймай, тұрғындардың табиғатқа деген жанашырлық көзқарасын айқын көрсетіп берді.
Қаланың барлық бес ауданында тазалық жұмыстары қарқынды жүргізілді. Көшелер мен аулалар, қоғамдық орындар ретке келтіріліп, қала келбетіне жаңа тыныс берілді. Мәселен, Әл-Фараби ауданының Терiскей шағын ауданындағы №33, 35 және 37 көпқабатты үйлердің ауласы толықтай тазартылды. Балалар ойын алаңдары, жасыл аймақтар күл-қоқыстан аршылып, тұрғындар мен коммуналдық қызмет мамандарының бірлескен еңбегі нәтижесінде аула жаңа бейнеге енді. Сенбілікке қатысушылардың пікірінше, мұндай бастамалар тек қана тазалықты қамтамасыз етіп қоймай, қоғамдағы бірлік пен ынтымақты күшейтеді. Тұрғындар табиғатқа жанашырлықпен қараудың маңызын атап өтті. Олардың айтуынша, әрбір аула мен көше, саябақтың таза болуы – келер ұрпаққа қалдыратын асыл мұра. Экологиялық мәдениетті қалыптастыру үшін мұндай шараларға барша халықтың қатысқаны жөн. Сенбілік жұмыстары қаладағы өзге аудандарда да жоғары деңгейде өтті. Абай ауданында Ақжайық шағын ауданындағы Асфендияров көшесі тазаланып, Еңбекші ауданында №30 мектеп аумағы ретке келтірілді. Қаратау ауданында Нұртас шағын ауданындағы Кеңжарық және Құлагер көшелерінің бойы қоқыстан аршылса, Тұран ауданында Темірлан тас жолының бойындағы көпқабатты үйлердің аулалары абаттандырылды.
Аталған шараға қала жастары да белсене қатысты. Шымкент қалалық Жастар ресурстық орталығының бастамасымен көптеген ерікті мен студенттер сенбілікке атсалысып, өз үлесін қосты. Жастардың белсенділігі – болашақта экологиялық мәдениеттің тұрақты қалыптасатынын айғақтайды. Олар табиғатты қорғаудың маңызын түсініп қана қоймай, өзгелерге үлгі көрсетті. Жалпы алғанда, «Таза Қазақстан» мемлекеттік бағдарламасы бүгінде өз нәтижесін беріп отыр. Қала тұрғындары тазалық мәдениетінің артып келе жатқанын атап өтуде. Мұндай бастамалар тек экологиялық ахуалды жақсартуға ғана емес, көршілер арасындағы өзара сыйластықты арттырып, қоғамдағы ынтымақты күшейтуге ықпал етеді. «Тазалық – иманның жартысы» деген халық даналығы осындай игі істердің мәнін аша түседі. Бұл сенбілік Шымкенттің жасыл келбетін сақтап қана қоймай, тұрғындарды ортақ жауапкершілікке шақырды. Қаладағы әрбір азаматтың табиғатты қорғауға атсалысуы – туған жерді көркейту жолындағы үлкен қадам.
