ҚҰҚЫҚТЫҚ КӨМЕК – АЗАМАТТАРДЫҢ СЕНІМІН АРТТЫРАТЫН БАСТАМА
Қазіргі қоғамда құқықтық сауаттылық деңгейінің жоғары болуы әрбір азамат үшін аса маңызды. Өйткені алимент өндіру, несие төлемін реттеу, алаяқтық жағдайларынан қорғау немесе өзге де жеке дауларды шешу кезінде заңды білу – әділ шешім табудың негізгі құралы. Дегенмен көп жағдайда тұрғындар құқықтық нормаларды толық білмегендіктен, түрлі қиындықтарға тап болып жатады. Осы орайда халыққа тегін кеңес беру мен құқықтық көмек көрсету шараларының ұйымдастырылуы қоғамда әділдік пен сенім орнатудың маңызды тетігіне айналуда.
Осы мақсатта «AMANAT» партиясының Шымкент қалалық филиалында «Құқықтық көмек» партиялық жобасы аясында тұрғындарды қабылдау ұйымдастырылды. Іс-шараға партияның қалалық филиалының атқарушы хатшысы Ербол Байқонысов, «Zangerler Palatasi» заң консультанты Нұрлан Мырзабай, Коммерциялық емес ұйымдарды тіркеу және тіркеу саласындағы бақылау бөлімінің бас маманы Шолпан Досаева, сондай-ақ адвокаттар алқасының тәжірибелі өкілі Бауыржан Мархабаев қатысты. Олар азаматтардың өтініштерін тыңдап, нақты құқықтық кеңес берді. Қабылдауға келгендердің басым бөлігі алимент өндіру мәселесін шеше алмай жүргендер болды. Бұл жағдай қазіргі таңда көптеген отбасылар үшін күрделі әлеуметтік түйткілге айналып отыр. Сонымен қатар алаяқтардың арбауына түскендер, несие төлеміне байланысты қиындық көргендер және түрлі жеке дауларды реттей алмай жүрген азаматтар да өз өтініштерін жеткізді. Әрбір өтініш жеке қаралып, заң аясында түсініктеме берілді. Кейбір мәселелер сол сәтте оң шешімін тапса, күрделі сипаттағы сұрақтар арнайы хаттамаға енгізіліп, бақылауға алынды. Бұл – қабылдаудың тек кеңес беру алаңы ғана емес, нақты іс-шаралар жоспарын қалыптастыру тетігі екенін көрсетеді. Мұндай тәсіл азаматтардың сенімін арттырып қана қоймай, олардың құқықтарының қорғалуына нақты кепілдік береді.
Партия өкілдері мұндай қабылдаулардың тұрақты түрде жалғасатынын атап өтті. Бұл шаралар, бір жағынан, халықтың құқықтық сауаттылығын арттыруға бағытталса, екінші жағынан, қоғамда туындайтын әлеуметтік-құқықтық мәселелерді дер кезінде шешуге мүмкіндік береді. Әсіресе, құқық қорғау органдарына немесе сотқа дейінгі деңгейде реттеуге болатын дауларды осындай қабылдаулар барысында шешу – уақытты да, ресурсты да үнемдейді. Жалпы алғанда, «Құқықтық көмек» жобасы азаматтардың өз құқықтарын қорғауға деген сенімін арттырып, әділ қоғам құруға ықпал ететін бастама ретінде бағаланады. Шымкентте өткен қабылдау осының айқын көрінісі болды. Мұндай жұмыстардың жүйелі түрде жалғасуы – қоғамдағы құқықтық мәдениетті нығайтып, әлеуметтік әділеттіліктің орын алуына септігін тигізері сөзсіз.
