АДАЛДЫҚ ПЕН ОТАНСҮЙГІШТІК – «АДАЛ АЗАМАТ» БАҒДАРЛАМАСЫНЫҢ БАСТЫ БАҒЫТЫ
Шымкент қаласы білім басқармасына қарасты №59 жалпы орта білім беретін мектепте «Адал азамат» біртұтас тәрбие бағдарламасы аясында ұлттық мереке – 25 қазан Республика күніне арналған мазмұнды іс-шаралар ұйымдастырылды. Мектептің 1–11 сынып оқушылары белсенді қатысқан бұл апталық «Республикам – мақтанышым!» атты сынып сағаттарымен және қауіпсіздік сабақтарымен ерекшеленді.
Іс-шаралардың басты мақсаты – жас ұрпақтың бойына елжандылық рух пен ұлттық сана сезімін қалыптастыру, өз Отанын сүюге, мемлекет жетістіктерімен мақтануға тәрбиелеу. Сонымен қатар, оқушылардың өмір қауіпсіздігін қамтамасыз ету, қауіпсіз мінез-құлық мәдениетін дамыту мәселесіне де баса назар аударылды. «Республикам – мақтанышым!» тақырыбындағы сынып сағаттарында оқушылар ел тарихының маңызды кезеңдерімен, Қазақстанның тәуелсіздікке жету жолындағы күрделі сәттерімен және қазіргі жетістіктерімен танысты. Мұғалімдер балаларға ел рәміздерінің мәнін, олардың тарихи маңызын түсіндіріп, мемлекеттік мерекелердің ұлт рухын көтерудегі рөлін баяндады. Сабақтар барысында оқушылар патриоттық тақырыптағы өлеңдер оқып, көріністер қойды, Республика күніне арналған бейнероликтер мен презентациялар көрсетті. Жас буын өз шығармашылығы арқылы туған еліне деген сүйіспеншілігін білдіріп, Қазақстанның болашағы үшін жауапкершілік сезімін оятты. Іс-шараның екінші бағыты – қауіпсіздік сабақтары да ерекше мәнге ие болды. Бұл сабақтарда оқушыларға жолда жүру ережелері, өрт қауіпсіздігі, төтенше жағдайлар кезіндегі дұрыс іс-әрекеттер және интернет қауіпсіздігі туралы практикалық мәліметтер берілді. Мұғалімдер мен тәрбиешілер балаларға қауіпсіз өмір салтының ережелерін түсіндіріп, олардың өз өмірі мен қоршаған ортаға жауапкершілікпен қарауына бағыт берді.
Мектеп әкімшілігі мен ұстаздар қауымы аталған іс-шаралардың «Адал азамат» біртұтас тәрбие бағдарламасының басты қағидаттарымен үндес екенін атап өтті. Бағдарламаның негізгі мақсаты – оқушыларды адалдыққа, еңбексүйгіштікке, жауапкершілік пен отансүйгіштікке баулу. Республика күніне арналған сабақтар арқылы балалар елін сүйетін, өз мемлекетінің жетістіктерін мақтан тұтатын, болашағына сеніммен қарайтын азамат болудың маңызын түсінді. Оқушылардың белсенділігі мен қызығушылығы іс-шараның тәрбиелік мәнінің зор екенін көрсетті. Әрбір сынып өз ерекшелігімен көзге түсіп, патриоттық мазмұндағы қойылымдар мен шығармашылық жұмыстар ұсынды. Ал қауіпсіздік сабақтары жас буынның өмірлік дағдыларын қалыптастырып, жауапкершілік сезімін арттыруға сеп болды. Мұндай іс-шаралар жас ұрпақтың рухани және азаматтық дамуына серпін беріп, олардың ел тағдырына бейжай қарамайтын белсенді тұлға болып өсуіне ықпал етеді. №59 мектеп ұжымы «Адал азамат» бағдарламасы аясында патриоттық және қауіпсіздік бағытындағы жұмыстарды алдағы уақытта да жүйелі түрде жалғастыруды жоспарлап отыр.
