БІЛІМ ОРДАСЫНДА МАЗМҰНДЫ КЕЗДЕСУ ӨТТІ
Шымкент қаласы білім басқармасына қарасты №80 IT мектеп-лицейінде 2025 жылғы 4 қараша күні 8-9 сынып оқушыларына арналған «Цифрлық әлемде қауіпсіз қадам» тақырыбындағы ақпараттық қауіпсіздік іс-шарасы өткізілді. Бұл шара жасөспірімдерді интернет пен цифрлық кеңістікте қауіпсіздік пен жауапкершілікке үйретуге, кибергигиена мен медиа сауаттылықты арттыруға бағытталды.
Іс-шараға Шымкент қаласы Ішкі саясат және жастар істері жөніндегі басқармасының «Жастар ресурстық орталығы» КММ маманы Қоңырат Үміт Қайсарқызы, Шымкент қаласы Қаратау ауданы прокуроры Тұрсынбай Дәурен Дәулетұлы, ДТІЖО Алтынбекова Айгерім Алтынбекқызы және мектеп психологы С.Мырзалиева қатысты. Олар жасөспірімдерге интернет кеңістігінде өздерін қорғау, құқық бұзушылықтан сақтану және цифрлық мәдениетті қалыптастыру жолдарын түсіндірді. Іс-шара барысында оқушыларға ақпараттық қауіпсіздік ережелері, жеке деректерді қорғау жолдары, кибергигиена мен кибермәдениетті сақтау маңыздылығы, медиа сауаттылықты арттыру тәсілдері жан-жақты түсіндірілді. Мамандар интернеттегі алаяқтық, кибербуллинг және басқа құқық бұзушылық түрлерінің салдары туралы ақпарат беріп, одан қалай сақтану керектігін түсіндірді. Сонымен қатар, онлайн ортадағы әдеп пен жауапкершілік, цифрлық қауіпсіздікті сақтау және интернеттегі қауіпті жағдайларда әрекет ету жолдары қарастырылды. Мектеп психологы С.Мырзалиева оқушыларға цифрлық ортадағы эмоционалдық тұрақтылықты сақтау, интернеттегі кері ықпалды болдырмау және киберқысымға қарсы тиімді стратегияларды үйретті. Тренинг барысында оқушылар өз тәжірибелерін бөлісіп, кибербуллинг пен алаяқтыққа қарсы нақты іс-әрекет жолдарын талқылады.
Іс-шараның негізгі мақсаты — жас ұрпақтың интернет пен цифрлық кеңістіктегі сауаттылығын арттыру, құқық бұзушылықтың алдын алу және қауіпсіз интернет мәдениетін қалыптастыру. Бұл тәжірибе оқушыларға саналы түрде онлайн әрекет етуді үйретіп, олардың цифрлық қоғамда өз құқықтары мен міндеттерін түсінуіне, жеке деректерін қорғауға және жауапкершілікпен әрекет етуге мүмкіндік берді. Оқушылар іс-шарадан алған білімдерін күнделікті өмірде қолдану арқылы интернет пен әлеуметтік желілерді қауіпсіз әрі тиімді пайдалануға дағдыланды. Бұл тәжірибе олардың өздерінің және айналасының қауіпсіздігіне деген жауапкершілігін арттыруға септігін тигізеді. Шара нәтижесінде қатысушылар интернеттегі қауіп-қатерлерді дұрыс бағалауды, кибербуллингтен қорғануды, медиа сауаттылықты дамытуды және цифрлық қоғамда саналы әрекет етуді меңгерді. Осындай іс-шаралар «Адал азамат» біртұтас тәрбие бағдарламасының мақсатына сәйкес, жасөспірімдердің ақпараттық, құқықтық мәдениетін арттыруға бағытталған.
