НҰРАЛХАН КӨШЕРОВ «MAGISTER ART» КОМПАНИЯСЫНЫҢ ПРЕЗИДЕНТІ РЕНАТО САПОРИТОМЕН КЕЗДЕСТІ
Түркі әлемінің рухани астанасы, көне тарихтың алтын бесігі саналатын киелі Түркістан шаһары бүгінде жаһандық деңгейдегі озық технологиялар мен мәдени жобалардың тоғысқан орталығына айналып келеді. Осы орайда, Түркістан облысының әкімі Нұралхан Көшеров пен италиялық әйгілі «Magister Art» компаниясының президенті Ренато Сапоритоның арасында өткен ресми кездесу өңірдің халықаралық деңгейдегі мәдени-инновациялық имиджін арттыруға бағытталған тағы бір батыл қадам болды.
Келелі басқосу барысында қос тарап құрылыс, мәдениет, заманауи креативті индустрия және халықаралық ынтымақтастықты тереңдету бағытындағы бірлескен ауқымды жобаларды жүзеге асырудың өзекті мәселелерін егжей-тегжейлі талқылады. Облыс басшысы өңірдің бай тарихи-мәдени мұрасын әлемдік аренада паш ету, туризм әлеуетін жаңа белеске шығару және бұл үдеріске заманауи цифрлық шешімдерді батыл енгізу бағытында атқарылып жатқан ауқымды жұмыстарға жеке-жеке тоқталып өтті. Сондай-ақ, аймақта туризм саласын ілгерілету мен сырттан тікелей инвестиция тарту ісіне мемлекет тарапынан ерекше мән беріліп отырғанын айрықша қадап айтты. «Тарихи Түркістанға қош келдіңіздер. Өңірімізде инвестиция тартуға, отандық өндірісті дамытуға барынша басымдық берілген. Оған қоса туризм мен мәдениет, руханият салалары да тұрақты назарымызда тұр. Екі елге де тиімді болатын жаңа сәулеттік жобалар мен соны бағыттар бойынша кез келген тың ұсыныстарды бірлесе талқылауға әрқашан дайынбыз», – деді Нұралхан Көшеров италиялық меймандарға өңірдің ашықтығы мен инвестициялық тартымдылығын таныта отырып.
Өз кезегінде жоғары мәртебелі қонақ Ренато Сапорито да қазақ елінің қонақжайлылығы мен Түркістанның өркендеу қарқынына жоғары баға беріп, жылы лебізін білдірді. «Уақыт бөліп, арнайы қабылдап, қарсы алғандарыңызға шын жүректен алғыс айтамын. Қазақстан топырағына аяқ басқан сайын өзімді ерекше бақытты сезінемін. Бұл – өте қарқынды, көз ілеспес жылдамдықпен дамып келе жатқан жасампаз ел. Алдағы уақытта ортақ ұсыныстарды мұқият қарастырып, өзімнің кәсіби көмегімді көрсетуге және өңірмен берік әрі ұзақмерзімді әріптестік байланыс орнатуға ниеттімін», – деп ағынан жарылды. Сұхбат барысында Түркістан облысының аумағында бірлескен мәдени-туристік жобаларды өмірге әкелу, көне тарихи нысандар мен жәдігерлерді заманауи цифрлық форматта қайта жаңғыртып таныту, халықаралық деңгейдегі беделді көрмелерді ұйымдастыру және шығармашылық индустрияны жаңа арнаға бұру мәселелері қызу сөз болды. Жиын қорытындысында қос тарап алдағы уақытта өзара тиімді ынтымақтастықтың іргетасын бекітіп, нақты бірлескен жобаларды іс жүзінде іске асыру мүмкіндіктерін бірлесе қарастыруға уағдаласты.
Айта кетерлігі, бұл кездесудің Түркістан үшін маңызы өте зор. Себебі, Италияның Милан және Рим қалаларында бас кеңселері орналасқан, дүниежүзілік ауқымда аты озған «Magister Art» – цифрлық технологияларға басымдық беретін, мәдени және креативті индустрия саласында жұмыс істейтін әлемдік деңгейдегі инновациялық компания. Көне құрлықтағы бұл алпауыт құрылымның негізгі миссиясы – халықтардың ұлттық мәдени мұрасын заманауи тілде насихаттау және оны кеңінен таныту болып табылады. Компанияның халықаралық операциялық бөлімшелері де жоғары деңгейде қызмет көрсетеді. Креативті индустрияның алыбы саналатын бұл кәсіпорын «Дизайн және архитектура», «Медиа», «Бренд дизайны және коммуникациялар», «Операциялық қызмет», «IT» және «Редакциялық әрі бизнес-стратегиялар» секілді негізгі департаменттері арқылы кез келген күрделі идеяны «дайын жоба» форматында, яғни нөлден бастап толық аяқталуына дейін кешенді түрде әзірлеп, жүзеге асыруға қауқарлы. Осындай жаһандық инновациялық тәжірибенің Түркістанның тарихи келбетімен үндесуі алдағы уақытта өңірге келетін шетелдік туристер ағынын еселеп, қасиетті шаһардың даңқын дүние жүзіне паш ететін жаңа бір белестің бастауы болмақ.
