8 АЙ ІШІНДЕ 1 700 ЖАҢА ЖҰМЫС ОРНЫ АШЫЛДЫ
Түркістан – қарқынды дамып келе жатқан, экономикалық әлеуеті жоғары заманауи шаһар. Көне шаһардың келбеті қайта жаңғырып, өндірісі өркендеп, инфрақұрылымы кеңейген сайын жергілікті билікке де үлкен жауапкершілік жүктелері хақ. Осы орайда, Түркістан қаласында әлеуметтік-экономикалық даму бағытындағы кешенді жұмыстар жүйелі түрде өз жалғасын тауып келеді. Кезекті лездемелік мәжілісте ағымдағы жылдың қаңтар-тамыз айларындағы негізгі индикаторлардың орындалу барысы сараланып, қаланың даму қарқыны таразыланды. Жиында қала әкімі Әзімбек Пазылбекұлының нақты тапсырмаларына сәйкес, жыл басынан бергі сегіз айдың қорытындысы қаралды. Әкімдік өкілдері мен жауапты бөлім басшылары бас қосқан жиында экономикалық және әлеуметтік салалардағы көрсеткіштердің орындалу деңгейі егжей-тегжейлі талқыланды.
Ең алдымен, нақты сандар мен экономикалық динамикаға тоқталар болсақ, шаһардың өнеркәсіп пен сауда саласындағы көрсеткіштері көңіл көншітерлік деңгейде. Мәселен, есепті кезеңде өнеркәсіп өнімінің жалпы көлемі 36,7 миллиард теңгені құрады. Оның ішінде өндірістің локомотиві саналатын өңдеу өнеркәсібіне 22 миллиард теңге тиесілі болып отыр. Бұл цифрлар қаладағы өндірістік қуаттың артып, отандық өнім шығару бағытының жанданып келе жатқанын айқын аңғартады. Сонымен қатар, халықтың тұтыну қабілеті мен ішкі нарықтың белсенділігін білдіретін бөлшек сауда көлемі де едәуір ұлғайып, 103,8 миллиард теңгеге жетті. Шаһардың сәулеттік келбетін өзгертіп, құрылыс саласын жаңа деңгейге көтерген жұмыстардың да ауқымы кең. Сегіз айдың ішінде құрылыс жұмыстарының көлемі 175,9 миллиард теңгені құрады. Осы қарқынды құрылыстың нәтижесінде қала тұрғындары үшін қуанышты жаңалық – 277,2 мың шаршы метр тұрғын үй пайдалануға берілді. Бұл баспана кезегінде тұрған және өз баспанасына қол жеткізгісі келетін жүздеген отбасы үшін үлкен қолдау болғаны сөзсіз.
Инвестиция – кез келген өңірдің, соның ішінде Түркістан сияқты жас облыс орталығының экономикалық тамырына қан жүгіртетін негізгі фактор. Шаһарға инвесторлар тарту, оларға қолайлы жағдай жасау және жаңа өндіріс орындарын ашу бағытында бірізді саясат жүргізілуде. Мәжілісте келтірілген деректерге сүйенсек, қаңтар-тамыз айларында негізгі капиталға 217,8 миллиард теңге инвестиция бағытталған. Инфрақұрылымдық дамудың тағы бір айқын үлгісі ретінде Бекзат шағынауданындағы өндірістік парк аумағында орын алған оң өзгерістерді айтуға болады. Мұнда 5 өндірістік ғимараттың құрылыс жұмыстары толықтай аяқталып, пайдалануға дайын болды. Оған қоса, жалпы құны 11,8 миллиард теңгені құрайтын 4 бірдей ірі инвестициялық жобаны орналастыру бойынша маңызды келісімшарттарға қол қойылды. Ең бастысы, бұл жобалар толық қуатында іске қосылған кезде жергілікті тұрғындар үшін 580 жаңа жұмыс орны ашылатын болады. Бұл тұрғындардың жұмыспен қамтылуын арттырудағы елеулі қадам екені даусыз.
Түркістанның басты бренді әрі негізгі даму драйверлерінің бірі – туризм саласы. Тарихи-мәдени мұрасы бай шаһарда бұл бағытта да жоғары оң динамика байқалады. Жыл басынан бері 8 ай ішінде туризм секторына тартылған инвестиция көлемі 39 миллиард теңгеге жетіп, өткен жылдың сәйкес кезеңімен салыстырғанда 56 пайызға бір-ақ өсті. Бұл Түркістанның инвесторлар үшін тартымдылығы артып келе жатқанының нақты дәлелі. Ал ағымдағы жылдың қаңтар-маусым айларындағы аралықта туризм саласында көрсетілген қызметтердің көлемі 3,1 миллиард теңгеге жетіп, 55 пайыздық өсімді көрсетті. Шеттен келетін меймандар мен жергілікті саяхатшыларға көрсетілетін қызмет сапасының артуы – қала бюджетіне де, шағын және орта бизнестің дамуына да оң ықпал етуде. Әрине, экономикалық жетістіктердің түпкі мақсаты – халықтың әлеуметтік жағдайын жақсарту. Есепті кезеңде әлеуметтік салада да айтарлықтай нәтижелерге қол жеткізілгені байқалады. Сегіз айдың ішінде қалада 1 700 жаңа жұмыс орны құрылды. Әсіресе, субсидияланатын жұмыс орындарын ұйымдастыру бағытында жоспар асыра орындалды. Бастапқыда 720 адамды жұмыспен қамту жоспарланған болса, нәтижесінде 1 720 азамат тұрақты әрі субсидияланатын жұмыс орындарына орналастырылды. Бұл – халықты нәтижелі жұмыспен қамтудағы үлкен көрсеткіш. Сонымен қатар, балабақша мен мектепке дейінгі білім беру саласында да маңызды белес бағындырылды. Түркістанда мектепке дейінгі тәрбиемен қамту көрсеткіші 100 пайыздық деңгейге жетті. Бұл – жас отбасылар үшін өте маңызды әрі қуанышты шешім болғаны сөзсіз.
