ИНВЕСТИЦИЯ КӨЛЕМІ 29 ПАЙЫЗҒА АРТТЫ
Шымкент қаласында биыл 5 айда қала экономикасына 131,1 млрд. теңге инвестиция тартылып, өткен жылдың тиісті кезеңімен салыстырғанда 29%-ға ұлғайған. Бұл өңіріміз үшін ғана емес, жалпы елдің өзге өңірлерімен салыстырғанда жоғары көрсеткіш.
Бұл туралы бүгін ҚР Премьер-министрдің төрағалығымен өткен Үкімет отырысында айтылды. Қала әкімі Мұрат Әйтенов күн тәртібіне сәйкес, инвестициялық саясат тұжырымдамасының жүзеге асырылу барысы жөнінде баяндады. Өңірде жыл соңына дейін 538 млрд.теңге инвестиция тарту жоспарлануда, бұл 2021 жылмен салыстырғанда 16%-ға артуы күтілуде деді. Бұл көрсеткішке 2022-2025 жылдары қалада жүзеге асырылатын құны 2,6 трлн. теңге құрайтын 242 инвестициялық жобалардың пулы әсер етпек. Оның ішінде, өңдеу өнеркәсібі саласында құны 550 млрд. теңгені құрайтын 45 жоба іске асырылады.
— Шымкент қаласының әкімдігі 2025 жылға дейінгі инвестиция тарту жоспарына сәйкес жұмыстар жүргізуде. Біздің жоспарымыз бүгінгі Қазақстан Республикасының Ұлттық экономика министрлігімен ұсынылған 2026 жылға дейінгі Инвестициялық саясат тұжырымдамасына сәйкес келеді. Алдағы уақытта осы бағыттағы жұмыстар жалғасатын болады, -деп сөзін түйіндеді үшінші мегаполис әкімі Мұрат Дүйсенбекұлы.
Жасыратыны жоқ, бүгінде Шымкенттегі шағын және орта кәсіпкерлік қарқын алған. Индустриалды аймақтардың игілігін көрген кәсіпкерлер бюджетке қыруар қаржы құйып отыр. Сонымен қатар жүздеген тұрғынды жұмыспен қамтып, әлеуметтің әлеуетінің артуына да сеп бола түсуде. Аталған бағыттағы жұмыстар болашақта да жалғаса береді. Инвестициялық тартымдылықты арттыру бағытында да қыруар іс тынуда. Оның бір мысалы ретінде индустриалды аймақтардың құрылу бастамасын алуға болады. Мұның өзі көптеген кәсіпкердің қаржы құйып, жұмыс орындарын көбейтуге үлес қосатынын көрсетеді.
