КӨКБҰЛАҚТА КӨШПЕЛІ ҚОҒАМДЫҚ ҚАБЫЛДАУ ӨТТІ
AMANAT партиясы халықпен тұрақты диалог орнату мақсатында көшпелі қоғамдық қабылдауларды жүйелі түрде өткізіп келеді. Соның бір көрінісі ретінде Шымкент қаласына қарасты Көкбұлақ тұрғын алабында ұйымдастырылған қабылдау партия жұмысының ашықтығын көрсетіп қана қоймай, жергілікті тұрғындардың өзекті мәселелерін шешуге нақты ықпал етті. Қоғамдық қабылдауға партияның республикалық консультанты, қалалық филиал өкілдері, әкімдік қызметкерлері, құқық қорғау органдары және кәсіби заңгерлер қатысты.
Мұндай кең ауқымды қатысу тұрғындар үшін мәселелерді кешенді түрде талқылап, бірден жауап алуына мүмкіндік берді. Әрбір өтініш хаттамаға енгізіліп, тиісті басқармаларға жолданды. Бұл қабылдаудың формалды шара емес, нақты шешімдерге бағытталғанын көрсетеді. Кездесу барысында көтерілген мәселелердің басым бөлігі әлеуметтік-тұрмыстық сипатқа ие болды. Атап айтқанда, елдімекен ішіндегі жолдарды жөндеу, ауыз су мен электр энергиясының сапасын арттыру, балаларға арналған ойын алаңшаларын салу қажеттігі күн тәртібінде болды. Мұндай өтініштер тұрғындардың күнделікті өмір сапасына тікелей әсер ететіндіктен, олардың шешімі жергілікті халық үшін айрықша маңызды. Партия өкілдері бұл түйткілдердің бақылауда екенін және олардың шешімін табуға барынша ықпал ететінін атап өтті. AMANAT партиясының көшпелі қабылдаулары тек мәселелерді жинақтау емес, сонымен қатар құқықтық түсіндіру жұмыстарын жүргізу алаңы болып отыр. «Құқықтық көмек» жобасы шеңберінде азаматтар өз құқықтары мен міндеттері жайлы кәсіби кеңес алып, заң тұрғысынан қорғалу мүмкіндіктерін түсінді. Бұл әсіресе әлеуметтік әлжуаз топтар үшін үлкен қолдау болуда. Статистикалық деректерге жүгінсек, жыл басынан бері партия қала аумағында 253 қоғамдық қабылдау ұйымдастырған. Нәтижесінде 1997 өтініш қаралып, олардың 71 пайызы оң шешімін тапқан. Қалған өтініштер заң талаптарына сәйкес түсіндірілген. Бұдан бөлек, 8171 жеке шағымның 82 пайызы қанағаттандырылды. Бұл көрсеткіштер партияның халықпен тікелей жұмыс жүргізуінің тиімділігін дәлелдейді.
Көшпелі қабылдаулардың тағы бір маңызы – билік пен халық арасындағы байланысты нығайту. Тұрғындардың пікірін тыңдау, түйткілдерін назарға алу арқылы мемлекеттік органдардың ашықтығы артады. Әсіресе шалғайдағы шағынаудандар мен тұрғын алаптарында мұндай кездесулер азаматтардың өз проблемаларын жеткізуіне үлкен мүмкіндік береді. AMANAT партиясы қоғамдық қабылдаулар арқылы саяси институттың халыққа жақын болуы тиіс деген қағиданы іс жүзінде жүзеге асырып отыр. Бұл тәсіл тек партияның ғана емес, жалпы қоғамдағы әлеуметтік тұрақтылық пен азаматтардың сенім деңгейіне тікелей әсер етуде. Алдағы уақытта партия осындай қабылдауларды жүйелі түрде жалғастырып, тұрғындардың талап-тілектерін орындауға атсалыспақ. Көкбұлақтағы кездесуде байқалған белсенділік пен тұрғындардың сенім білдіруі – мұндай бастамалардың қажеттілігін айқын көрсетіп отыр. Жалпы алғанда, көшпелі қоғамдық қабылдаулар – азаматтардың үнін тікелей естудің, әлеуметтік әділеттілікті қамтамасыз етудің және ел дамуына халықты кеңінен тартудың тиімді тетігіне айналып келеді.
