ТУРИЗМ САЛАСЫНА ИНВЕСТИЦИЯ ТАРТУ МӘСЕЛЕСІ ТАЛҚЫЛАНДЫ
Түркістан облысында туризм саласы өңір экономикасының маңызды бағыттарының біріне айналып келеді. Соңғы жылдары бұл салаға ерекше көңіл бөлініп, туристік инфрақұрылымды дамыту, жаңа нысандарды іске қосу және инвестиция тарту бағытында жүйелі жұмыстар атқарылып жатыр. Облыс әкімі Нұралхан Көшеровтің бастамасымен туризм саласының әлеуетін арттыруға арналған нақты шаралар жүзеге асырылуда.
Осы мақсатта облыс басшысы «Бәйдібек қаған» қоғамдық қорының өкілдерімен арнайы кездесу өткізді. Басқосуда Бәйдібек ауданының туристік әлеуетін дамыту мәселесі жан-жақты талқыланды. Әсіресе, тарихи және киелі орындардың айналасын абаттандыру, туристерге қолайлы жағдай жасау және жаңа инфрақұрылымдық жобаларды жүзеге асыру мәселелеріне баса назар аударылды. Кездесу барысында облыс әкімі Нұралхан Көшеров ауданның бай тарихи және мәдени мұрасын тиімді пайдалану арқылы туристік бағыттарды кеңейту қажеттігін атап өтті. Оның айтуынша, Бәйдібек өңірі – қазақ халқының тарихында айрықша орын алатын киелі аймақтардың бірі. Мұнда көптеген тарихи ескерткіштер мен рухани маңызы жоғары нысандар орналасқан. Сондықтан бұл өңірде туризмді дамыту тек экономикалық тұрғыдан ғана емес, мәдени және рухани тұрғыдан да маңызды. «Туризм – өңірдің әлеуметтік-экономикалық дамуының қуатты қозғаушысы. Түркістан облысы ежелден киелі жерлерге бай. Сондықтан біз бұл әлеуетті тиімді пайдалануымыз керек. Бәйдібек ауданында туристерге арналған сапалы инфрақұрылым қалыптастыру, қонақүйлер мен сервистік нысандар салу – біздің басты мақсаттарымыздың бірі. Инвесторлар үшін қолайлы жағдай жасалып, әрбір жоба нақты қолдауға ие болуы тиіс» деді облыс әкімі.
Кездесуде «Бәйдібек қаған» қоғамдық қорының өкілдері де өз ұсыныстарын білдіріп, аймақтағы туристік әлеуетті арттыру бойынша бірқатар бастамаларды таныстырды. Атап айтқанда, киелі орындарға баратын жолдарды жөндеу, абаттандыру жұмыстарын күшейту және туристік соқпақтар санын арттыру мәселелері көтерілді. Сонымен қатар аудан аумағында жаңа қонақүйлер салу, отбасылық демалыс аймақтарын ашу және жол бойындағы қызмет көрсету нысандарын көбейту жоспарланып отыр. Облыс әкімі жауапты басқармаларға ұсыныстарды жан-жақты қарастырып, нақты шаралар қабылдауды тапсырды. Әсіресе, инвестициялық жобаларды сүйемелдеу және жеке секторды ынталандыру бағытында қосымша қолдау көрсетілетіні айтылды. Айта кетейік, Түркістан облысында туризм саласы жыл сайын тұрақты өсім көрсетіп келеді. 2025 жылдың алғашқы жартыжылдығының қорытындысы бойынша саладағы көрсеткіштер айтарлықтай артқан. Мәселен, биыл орналастыру орындарында 151 мың турист демалған. Бұл өткен жылдың дәл осы кезеңімен салыстырғанда 7 пайызға жоғары. Сонымен бірге өңірдің табиғи аймақтарына 8 айдың ішінде 123,2 мың адам келген, бұл көрсеткіш өткен жылдың сәйкес кезеңімен салыстырғанда 29,5 пайызға артқан. Тарихи және мәдени орындарға барушылардың саны да өсіп отыр. Биылғы есеп бойынша киелі жерлер мен тарихи нысандарға 736,3 мың адам саяхат жасаған. Бұл өткен жылдың ұқсас кезеңінен 7 пайызға көп. Сарапшылардың айтуынша, бұл өсім өңірде туризм саласының тартымдылығының артып келе жатқанын көрсетеді.
Саладағы оң өзгерістер тек туристер санының көбеюімен ғана шектелмейді. Туризм инфрақұрылымына тартылған инвестиция көлемі де айтарлықтай артқан. 2025 жылдың қорытындысы бойынша негізгі капиталға салынған инвестициялар көлемі 36,9 млрд теңгеге жеткен. Бұл өткен жылдың тиісті кезеңімен салыстырғанда 36,4 пайызға жоғары. Инвестициялардың көбеюі жаңа демалыс аймақтары мен қонақүйлердің, этноауылдардың және заманауи туристік кешендердің салынуына мүмкіндік беріп отыр. Сонымен қатар, өңірдің табиғи және тарихи нысандарын сақтау, инфрақұрылымды жаңарту, жолдарды жөндеу және санитарлық жағдайды жақсарту бағытында да бірқатар ірі жобалар іске асырылуда. Түркістан облысы бүгінде еліміздегі ең ірі туристік орталықтардың біріне айналып келеді. Рухани және мәдени мұраға бай өңірге келген туристердің қатарында шетелдік қонақтар да көп. Әсіресе, Түркістан қаласының және оның айналасындағы тарихи орындарға қызығушылық жылдан жылға артып келеді. Өңір басшылығының айтуынша, туризм саласын дамытудағы басты мақсат – Түркістанды халықаралық деңгейдегі туристік орталыққа айналдыру. Бұл бағытта мемлекеттік және жекеменшік серіктестік негізінде жаңа жобалар қолға алынбақ.
