ОҚУШЫЛАР ӨЗЕКТІ ТАҚЫРЫП БОЙЫНША ТЫҢ ИДЕЯЛАРЫН ОРТАҒА САЛДЫ
Шымкент қаласы білім басқармасына қарасты №131 жалпы орта білім беретін мектепте 2025 жылдың 21 қарашасында ерекше іс-шара ұйымдастырылды. Мектеп директоры Жарасова Гүлжан Спандиярқызының басшылығымен, қосымша білім беру педагогы А. Маметованың ұйымдастыруымен өткен шара Шымкент қаласы білім басқармасының Әдістеме орталығының хатына сәйкес, Дүниежүзілік балалар күніне арналған республикалық онкүндіктің мектепішілік жоспарына сай «Интернетті білім алуға пайдалану: пайдасы мен қаупі» тақырыбында пікірсайыс форматында өткізілді.
Қазіргі заманғы жас ұрпақ үшін интернет білім мен ақпарат алу, шығармашылық пен коммуникацияны дамытуда маңызды құрал болып табылады. Алайда оның артық немесе санасыз қолданылуы оқушының мінез-құлқына, эмоциялық тұрақтылығына және оқу қызметінің тиімділігін төмендетуге әсер етуі мүмкін. Пікірсайыс барысында оқушылар интернет ресурстарын дұрыс пайдалану, қауіпсіздік ережелерін сақтау, ақпараттың шынайылығын тексеру сияқты маңызды дағдылармен танысты. Шараның басты мақсаты – оқушыларға интернеттің мүмкіндіктерін саналы әрі қауіпсіз пайдалану дағдыларын үйрету. Пікірсайыс оқушылардың сыни ойлау қабілетін дамытуға, өз ойларын дәлелді түрде жеткізуге және ақпаратты талдай білуге ықпал етті. Сонымен қатар, интернетке тәуелділіктің зиянды әсерін түсіндіру арқылы олардың тұлғалық дамуын қолдау басты назарда болды. Оқушылар өз пікірін ашық айтуға, әртүрлі көзқарасты тыңдап, талқылауға үйренді. Бұл іс-шара «Адал азамат» біртұтас тәрбие бағдарламасының негізгі құндылықтарымен тікелей байланысты. Бағдарлама жасөспірімдерді жауапты, саналы, ақпаратты дұрыс қабылдай алатын тұлға ретінде қалыптастыруға бағытталған. Саналы интернет пайдалануды үйрету – оқушылардың цифрлық сауаттылығын арттырып, олардың тұлғалық және әлеуметтік дамуына ықпал ететін маңызды қадам болып табылады.
№131 мектепте өткен пікірсайыс жас ұрпаққа заманауи қауіп-қатерлерді түсінуге, интернетті тиімді және қауіпсіз пайдалануға дағдылануға мүмкіндік берді. Мұндай іс-шаралар оқушылардың өзіне деген сенімін арттырып, сыни ойлау қабілетін жетілдіріп, қоғамға пайдалы, саналы азамат болып өсуіне маңызды үлес қосады. Айта кету керек, «Адал азамат» бағдарламасының түпкі мақсаты – қоғамның мызғымас тірегі, отаншыл, білімді, жасампаз ұрпақ тәрбиелеу, әділеттіліктің, адамгершіліктің, жауапкершілік пен еңбексүйгіштіктің айқын бейнесі болатын адал азамат қалыптастыру.
