БИДАЙ ӨҢДЕЙТІН ЗАМАНАУИ ЗАУЫТ ҚАЙТА ЖАҢҒЫРТЫЛЫП, ІСКЕ ҚОСЫЛДЫ
Түркістан облысында ауыл шаруашылығы өнімдерін терең өңдеу бағыты өңірлік экономиканың негізгі драйверлерінің біріне айналып келеді. Соңғы жылдары агроөнеркәсіп кешенін дамытуға бағытталған жүйелі саясаттың нәтижесінде өндірістік қуаттар жаңғыртылып, экспортқа бағдарланған жобалар саны артуда. Осы үрдістің айқын көріністерінің бірі – Түлкібас ауданында «MK ALTYN NAN» жауапкершілігі шектеулі серіктестігінің ұн шығаратын зауытының қайта жаңғыртылып, толық іске қосылуы.
Маңызды диірмен кешенінің жұмысымен Түркістан облысының әкімі Нұралхан Көшеров арнайы танысып, кәсіпорын ұжымымен кездесті. Кездесу барысында өңір басшысы агроөнеркәсіп кешенін дамыту, ауыл шаруашылығы өнімдерін қайта өңдеу және қосылған құны жоғары өнім өндіру бағытындағы жобаларға облыс деңгейінде ерекше мән беріліп отырғанын атап өтті. Мұндай өндіріс орындарының іске қосылуы тек бір кәсіпорынның ғана емес, тұтас ауданның әлеуметтік-экономикалық дамуына оң әсер ететіні, жаңа жұмыс орындарын ашып, халықтың әл-ауқатын арттыруға ықпал ететіні айтылды. Облыс әкімі Мемлекет басшысы Қасым-Жомарт Тоқаевтың Жолдауларында ауыл шаруашылығы саласын дамыту, шикізатты терең өңдеу үлесін арттыру жөнінде нақты тапсырмалар берілгенін еске салды. Түлкібаста іске қосылған бұл диірмен кешені – сол тапсырмалардың жергілікті деңгейде жүзеге асып жатқанын көрсететін нақты мысал. Қайта жаңғыртылған кәсіпорын облыстың өндірістік әлеуетін арттырып қана қоймай, аграрлық секторда заманауи технологияларды енгізуге және өнім сапасын жаңа деңгейге көтеруге жол ашып отыр. Нұралхан Көшеров инвесторларға алғыс білдіріп, жобаны одан әрі кеңейтуге және қолдау көрсетуге дайын екенін жеткізді.
Аталған кәсіпорынның тарихы өңірдің өнеркәсіптік дамуының әр кезеңін айқын көрсетеді. Диірмен кешені алғаш рет 1986 жылы іске қосылып, ұзақ жылдар бойы ауданның негізгі өндірістік нысандарының бірі болып келген. Алайда әртүрлі экономикалық себептерге байланысты 2018 жылы зауыт жұмысы тоқтап қалған. Соған қарамастан, инвесторлар тарапынан өндірісті қайта жандандыруға деген қызығушылық сақталып, 2024 жылдың желтоқсан айында кәсіпорын толықтай қайта жаңғыртудан өтті. Мемлекеттік қолдау тетіктерін пайдалана отырып, несие рәсімделіп, зауыттың өндірістік қуаты мен технологиялық мүмкіндіктері айтарлықтай арттырылды. Қазіргі таңда «MK ALTYN NAN» зауыты жылына 120 мың тонна бидай өнімін өңдеуге қауқарлы. Бұл – облыс көлеміндегі ірі диірмен кешендерінің бірі саналады. Кәсіпорында 140 адам тұрақты жұмыспен қамтылған, бұл Түлкібас ауданы үшін әлеуметтік тұрғыдан маңызды көрсеткіш. Жаңартылған өндіріс желілері еңбек өнімділігін арттырып, өнім сапасын халықаралық талаптарға сәйкестендіруге мүмкіндік беріп отыр. Кәсіпорын басшылығы алдағы уақытта жобаны кеңейтіп, өнім көлемін ұлғайту, сондай-ақ жаңа нарықтарға шығу жоспарын көздеп отыр.
Түлкібас ауданында өндірілген ұн тек Қазақстан Республикасының ішкі нарығында ғана емес, шетелге де экспортталуда. Атап айтқанда, өнім Өзбекстан, Түркіменстан және Ауғанстан нарықтарына жеткізіледі. Бұл өз кезегінде Түркістан облысының экспорттық әлеуетін арттырып, өңірдің аграрлық өнімдері сыртқы нарықта сұранысқа ие екенін дәлелдейді. Экспорт географиясының кеңеюі ауыл шаруашылығы саласындағы өндіріс көлемін тұрақты өсіруге және фермерлер үшін жаңа мүмкіндіктер қалыптастыруға жол ашады. Жалпы алғанда, Түлкібас ауданында іске қосылған бұл диірмен кешені өңірдің азық-түлік қауіпсіздігін қамтамасыз етуге де елеулі үлес қосады. Шикізатты терең өңдеу арқылы дайын өнім шығару ішкі нарықты сапалы ұнмен қамтуға, импортқа тәуелділікті азайтуға және баға тұрақтылығын сақтауға мүмкіндік береді. Сонымен қатар мұндай жобалар ауыл шаруашылығы саласын индустрияландыруға, аграрлық сектордың инвестициялық тартымдылығын арттыруға және өңір экономикасын әртараптандыруға ықпал етеді.
Түркістан облысында жүзеге асырылып жатқан осындай өндірістік жобалар өңірдің аграрлық әлеуетін толық пайдаланып, ауыл шаруашылығын жаңа сапалық деңгейге көтеруге бағытталған. «MK ALTYN NAN» диірмен кешенінің қайта іске қосылуы – осы бағыттағы жүйелі жұмыстың нақты нәтижесі. Алдағы кезеңде мұндай жобалардың саны артып, ауыл шаруашылығы өнімдерін терең өңдеу арқылы облыстың экономикалық өсіміне, экспорттық мүмкіндіктеріне және халықтың тұрмыс сапасына қосар үлесі одан әрі ұлғая түсері анық.
