ШЕТЕЛДІК ИНВЕСТОРЛАР ГҮЛ ШАРУАШЫЛЫҒЫН ҚОЛҒА АЛУҒА НИЕТТІ
Түркістан өңірі бүгінгі таңда еліміздің индустриялық-инновациялық және аграрлық дамуының басты қозғаушы күшіне айналып келеді. Мемлекет басшысы Қасым-Жомарт Тоқаевтың ел экономикасын әртараптандыру, өңірлерге тікелей шетелдік капиталды тарту, инвестициялық климатты жақсарту және экспорттық әлеуетті еселеу жөніндегі стратегиялық пайымын негізге алған Түркістан облысында бүгінде жасампаздық пен өрлеудің жаңа кезеңі басталды. Аймақтың экономикалық әлеуетін арттырып, жасыл экономика мен заманауи агротехнологияларды жаңа сапалық деңгейге көтеру бағытында атқарылып жатқан ауқымды жұмыстар аясында Түркістан облысының әкімі Нұралхан Көшеров Қытай Халық Республикасының белді де іргелі компанияларының бірі – «Shaanxi Silk Road City Holding Group Co., Ltd.» компаниясының бас директоры Юань Чжао Хуэймен және аталған құрылымның Қазақстандағы филиалының өкілдерімен арнайы кездесу өткізді. Сындарлы сұхбатқа арқау болған бұл басқосуда өңірдегі жылыжай кешендерін әртараптандыру, гүл шаруашылығын жаңаша сипатта дамыту және аймақты жүйелі көгалдандыру бағытындағы инвестициялық ірі жобаларды бірлесе жүзеге асыру мәселелері кеңінен талқыланды.
Ресми кездесу барысында тараптар жергілікті еңбекқор шаруалармен иық тіресе отырып бірлесіп жұмыс істеу, өңірді абаттандыру мен жасыл желекке бөлеуге ауадай қажетті әсем гүлдер мен сәндік ағаш көшеттерін жергілікті топырақта жерсіндіріп өсіру, сондай-ақ Аспанасты елінің заманауи жылыжай технологияларын оңтүстік өлкеге енгізу мүмкіндіктерін жан-жақты қарастырды. Өз сөзінде облыс әкімі Нұралхан Көшеров шетелдік инвесторлар ұсынған әрбір бастама мен жобалық ұсыныстардың жіті зерделенетінін, өңір үшін тиімділігі жоғары жобаларға мемлекет тарапынан жан-жақты қолдау көрсетілетінін нақпа-нақ жеткізді. Жақында ғана Қытай еліне ресми жұмыс сапарымен барып, бірқатар ірі инвесторлармен нәтижелі келіссөздер жүргізгенін тілге тиек еткен өңір басшысы бүгінде екі ел арасындағы өзара әріптестік пен достық байланыстардың уақыт өткен сайын нығайып, жаңа серпін алып келе жатқанын атап өтті. Облыс басшылығы аймақ экономикасына тың серпін беретін, жаңа тұрақты жұмыс орындарын ашатын кез келген өндірістік және аграрлық жобаларды қолдауға әрқашан әзір. Түркістан облысының климаттық ерекшелігі мен табиғи жағдайы жылыжай шаруашылығын мейлінше өркендетуге өте қолайлы, мүмкіндігі мол. Осы ретте өңірді көгалдандыруға қажетті гүлдер мен ағаш түрлерін өз ішімізде өсіру жобасы өте өзекті болып табылады. Мемлекет тарапынан шетелдік инвесторлардың жергілікті шаруалармен тығыз байланыс орнатуына, тәжірибе алмасуына барынша көмек көрсетіледі. Басталған бұл жобаның алғашқы сынақ кезеңі сәтті аяқталған жағдайда, жоба ауқымын одан әрі кеңейтуге әкімдік тарапынан барлық жағдай жасалмақ.
Өз кезегінде қытайлық инвесторлар Түркістан облысының агроөнеркәсіптік әлеуетіне, соның ішінде гүл шаруашылығын өндірістік негізде дамытуға ерекше қызығушылық танытып отырғандарын зор ризашылықпен жеткізді. Құрғақ сөзден нақты іске көшкен алпауыт компания қазіргі таңда облыстың құнарлы мекені саналатын Сарыағаш ауданында бұталы раушан гүлдерін тәжірибелік негізде егу жұмыстарын бастап та кеткен. Алғашқы сынақ нәтижелері оң болып, оңтүстіктің шуақты күні мен құнарлы топырағына раушан гүлдері бой үйреткен жағдайда, инвесторлар жоба аясын мейлінше кеңейтіп, гүл өсірілетін алқап көлемін 20 гектарға дейін ұлғайтуды жоспарлап отыр. Компания өкілдерінің пайымдауынша, бұл өлкеде өндірілетін гүл өнімдерінің болашағы өте жарқын, өйткені бұл тауарларға көршілес Орталық Азия елдері мен алып Ресей нарығында сұраныс жоғары. Осыған байланысты Түркістан облысында экспортқа бағдарланған, халықаралық бәсекеге қабілетті бірегей өндірісті дамытуға үлкен даңғыл жол ашылмақ.
Кездесуді қорытындылай келе, тараптар алдағы уақытта атқарылатын бірлескен іс-қимылдардың алгоритмін айқындады. Уағдаластыққа сәйкес, компания таяу күндері өңірдің климаттық ерекшеліктеріне толықтай бейімделген әсем гүлдер мен сәндік ағаштардың бірнеше түрін сынақ ретінде отырғызу жұмыстарын ресми түрде бастайтын болды. Сынақ кезеңінің нәтижелері сәтті шыққан жағдайда, бұл жоба Түркістан облысын жасыл желекке бөлеп, экологиялық ахуалды жақсартып қана қоймай, аймақты Орталық Азиядағы гүл экспортының басты орталығына айналдыруға қуатты серпін берері сөзсіз. Қос тараптың бұл жасампаз қадамы алдағы уақытта да облыс әкімінің тікелей қатаң бақылауында болып, өңірдің экономикалық және экологиялық қуатын арттыра түспек.
