ЖАС МАМАНДАРМЕН КЕЛЕЛІ КЕЗДЕСУ ӨТТІ
Бүгінгі таңда өндіріс пен қызмет көрсету салаларында, соның ішінде өнер мен мәдениет мекемелерінде еңбек етіп жатқан жастардың орны мен рөлі айрықша зор. Жастардың еңбек ұжымындағы орны, олардың кәсіби тұрғыда қалыптасуы, өз құқықтарын терең білуі және еңбек қауіпсіздігі стандарттарын ұстануы – заманауи кәсіподақ қозғалысының ең басты да өзекті бағыттарының бірі. Осы мақсатта «Қазақстандық салалық мәдениет, спорт, туризм және ақпарат қызметкерлерінің кәсіптік одағы» қоғамдық бірлестігінің Түркістан облыстық филиалы мәдениет мекемелерінің жас қызметкерлерімен арнайы танымдық әрі сараптамалық кездесу ұйымдастырды.
Түркістан қаласындағы «Конгресс холл» көпсалалы кешенінде өткен алқалы дөңгелек үстел «Жас жұмыскерлер болашақ үшін кәсіподақтарға бірігеді» деген маңызды тақырыпқа арналды. Алқалы жиынға облыстық филиал төрағасы Темірхан Асылхан Темірханұлы мен «Келешек» жастар қанатының жетекшісі Айдос Әлқуат арнайы қатысып, кәсіподақ ұйымдарының жұмыскерлердің құқықтары мен заңды мүдделерін қорғаудағы салмақты маңызына кеңінен тоқталды. Сонымен қатар, жас мамандардың кәсіподақ қызметіне белсене араласуы, олардың қоғамдық бастамашылдығын арттыру және еңбек ұжымының ішкі тыныс-тіршілігіне ықпал ету жолдары жөнінде ауқымды түсіндіру жұмыстары жүргізілді. Өмір тәжірибесі көрсеткендей, кәсіподақ – тек еңбек құқықтары бұзылған немесе дау-дамай туындаған кезде ғана көмекке ұмтылатын ұйым емес. Ол – ең алдымен жұмыскерлердің ортақ мүддесін бір арнаға біріктіріп, әлеуметтік әріптестікті дамытуға, еңбек жағдайларын жақсартуға, кәсіби қауіпсіздік ережелерінің сақталуын қадағалауға және ұжымдағы өзара бауырмалдық пен қолдауды нығайтуға ықпал ететін негізгі институционалдық тұтқа. Осы себепті де жас мамандардың кәсіподақ қызметінің негізгі бағыттарын жете білуі, өздеріне жүктелген құқықтар мен міндеттерді түсінуі, сондай-ақ жұмыс орнындағы еңбек қауіпсіздігі талаптарын сақтаудың маңызын ұғынуы ерекше мәнге ие. Жиын барысында «Келешек» жастар қанатының жетекшісі Айдос Әлқуат Қазақстан Республикасы Кәсіподақтар федерациясының бастамасымен ағымдағы жылдың 7 қазанында «Жас қызметкерлер болашақ үшін кәсіподақтарға бірігеді» ұранымен өткен Дүниежүзілік лайықты еңбек үшін іс-қимыл күні туралы айтып өтті. Ол бұл халықаралық бастаманың жастардың еңбек құқықтарын қорғау, оларға қауіпсіз де лайықты еңбек жағдайларын қамтамасыз ету және жас қызметкерлердің кәсіподақ қозғалысындағы белсенділігін арттыру тұрғысынан қаншалықты салмақты екенін тілге тиек етті.
Бұл ретте еңбек қауіпсіздігі мәселесін айналып өту мүмкін емес. Өйткені кез келген салада, тіпті мәдениет пен өнер мекемелерінің өзінде сахналық жабдықтарды пайдалану, дыбыс және жарық қондырғыларымен жұмыс істеу, гастрольдік сапарлар мен ауыр репетициялар барысында техникалық қауіпсіздік пен еңбек гигиенасы басты орында тұруы тиіс. Кәсіподақ жастарды тек құқықтық тұрғыдан ғана емес, сонымен бірге олардың өмірі мен денсаулығына зиян келтірмейтін қауіпсіз жұмыс орнымен қамтамасыз етілуін бақылайтын басты кепіл болып табылады. Еңбек қауіпсіздігі мәдениетін жастай қалыптастыру – болашақтағы кәсіби жарақаттану мен келеңсіздіктердің алдын алудың ең сенімді жолы. Жалпы, Түркістанда өткен осындай жүйелі кездесулер жас жұмыскерлердің құқықтық сауатын арттырып қана қоймай, кәсіподақтың ұжымдық ынтымақтастық пен еңбек адамының мүддесін қорғаудағы, соның ішінде қауіпсіз еңбек ортасын қалыптастырудағы рөлін тереңірек түсінуге зор ықпал етеді. Еңбек адамының абыройы мен қауіпсіздігі жоғары қойылған қоғамда ғана тұрақты даму мен өркендеу болатыны сөзсіз.
