ЖАСТАРДЫҢ ЖАН-ЖАҚТЫ ДАМУЫНА БАРЛЫҚ ЖАҒДАЙ ЖАСАЛУДА
Өскелең ұрпақ – ертеңгі елдің болашағы. Оларға жасалған жағдай — кемел келешекті құруға бағытталған басты қадам. Сондықтан бүгінде балабақшалар мен мектептердің сапасына айрықша назар аударылып келе жатыр. Орта біліммен баршаны бірдей қамту — күрделі мәселе. Дегенмен қолда бар мүмкіндіктер шеңберінде білім ордаларының материалдық-техникалық базасының жақсарып келе жатқаны да анық. Шымкентте биыл мектептердегі орын тапшылығын шешу мақсатында бірнеше білім ордасында қосымша ғимарат салынып жатыр. Сонымен қатар бірқатар нысандар күрделі жөндеуден өтуде.
Биылғы күрделі жөндеуден өтетін білім ұйымының бірі — №3 балалар үйі. Аталған балалар үйі 1937 жылы ашылған. Бүгінде мекемеге тиесілі 9 ғимараттың 6-ы сараптама қорытындысына сәйкес жарамсыз деп танылған. Қала әкімі Мұрат Әйтенов білім нысандарын аралау барысында №3 балалар үйін күрделі жөндеу жұмыс барысын тексерді. Екі қабатты ғимараттың едендері мен есік-терезелері ауысып, шатыры жөнделеді. Тозығы жеткен электр жүйесі, су құбыры мен кәріз және жылыту жүйелері жаңарады. Балалар үйіндегі негізгі ғимарат 1964 жылы пайдалануға берілген. Сыйымдылығы 50 орынға лайықталған. Балалар үйінің негізгі ғимаратының ішкі бөлмелерінде және сыртқы. Қазір мұнда 47 бала тәрбиеленуде. Осы жылдың сәуір айында жөндеу жұмысы басталғаннан балалар №4 балалар үйіне орналастырылған. «Балалар үйінің жөндеу жұмысы жоғары деңгейде, әрі сапалы болуы керек. Өйткені балалар —біздің болашағымыз. Олардың мұнда өсіп, білім алуында ешқандай кедергі болмауы қажет. Көбіміздің ата-анамыз бар болса, мұндағы балалардың қамқоршысы мемлекет» деді қала әкімі Мұрат Дүйсенбекұлы. Аталған бағыттағы жұмыстар алдағы уақытта да жалғаса бермек. Жалпы өңірде балалардың жан-жақты дамуы үшін барлық жағдайлар жасалып келе жатыр. Оның ішінде, өскелең ұрпақтың талантын ұштап, талабын жону мақсатында Оқушылар сарайының құрылысы жүріп жатыр.
