ТҮРКІСТАН ҚАЛАСЫНЫҢ ЕРІКТІЛЕРІ ЖАСӨСПІРІМДЕР АРАСЫНДАҒЫ ҚЫЛМЫСТЫҢ АЛДЫН АЛУҒА КӨМЕКТЕСТІ
Түркістан қаласында кәмелетке толмағандар арасындағы қылмыстар мен құқық бұзушылықтардың жолын кесу және алдын алу мақсатында жергілікті полиция қызметкерлері еріктілермен бірге бірлескен профилактикалық іс-шарасы жүзеге асырады.
Сөйтіп еріктілер жастар мен жасөспірімдердің шоғырлану орындарын тексеруге бағытталған 100-ден астам рейдтік іс-шараларға қатысты.
Іс-шаралар барысында төрт жүзден аса жасөспірім әкімшілік құқық бұзушылық үшін полицияға жеткізілді, оның ішінде түнгі қараусыз қалғаны үшін — 402, алкоголь ішкені үшін — 14, темекі мен темекі өнімдерін пайдаланғаны үшін – 12 кәмелетке толмаған бар. Жүргізіліп жатқан рейдтік іс-шаралар кезінде 25 жағдайда спирттік ішімдіктерді пайдаланудың жолы кесілді.
Сонымен қатар, еріктілер үйден немесе білім беру ұйымдарынан кетіп, жоғалған кәмелетке толмағандарды іздеу шараларына белсенді қатысады. Жыл басынан бері еріктілердің көмегімен жиырмадан аса жасөспірімнің орналасқан жері анықталды.
Сондай-ақ, полиция қызметкерлерімен бірлесіп 350-ден астам дәрістер мен ақпараттық-түсіндіру әңгімелері өткізілді.
— Қоғамдық тәртіпті қорғауға бей-жай қарамайтын азаматтарды тарта отырып, полицейлер кәмелетке толмағандар арасындағы құқық бұзушылықтардың алдын алу жөніндегі жұмыстың тиімділігін арттыруға ғана емес, сонымен қатар қоғам алдындағы жауапкершілік сезімін нығайтуға, құқықтық сауаттылықты арттыруға және жасалған құқық бұзушылықтарға халық арасында «нөлдік төзімділік» қағидатын қалыптастыруға септігін тигізді, — дейді қалалық полиция басқармасының жергілікті полиция қызметі бөлімі бастығының орынбасары Әдрахман Тоқбергенов.
Түркістан қалалық полиция басқармасы, еріктілерге, жасөспірімдер қылмысына қарсы күрестегі белсенді азаматтық ұстанымы, бастамашылығымен қала тұрғындарын өңірдегі құқықтық тәртіпті сақтауға үлгі көрсете білгені үшін алғыс білдірді.
