“ЖАСТАРМЕН — БІР ТОЛҚЫНДА”: БЕЛСЕНДІ ЖАСТАР БАС ҚОСТЫ
Түркістанда “Жастармен — бір толқында” атты аудан, қаланың белсенді жастарының қатысуымен кездесу өтті.
Кездесудің мақсаты — жастардың өзін-өзі басқару және көшбасшылық қасиеттерін дамыту, өз қабілеттерін дамытуға, жаңа идеяларды жүзеге асыруға мотивация беру және табысқа жету жолында кездесетін кедергілерді қалай жеңуге болатынын үйрету. Сонымен қатар, өмірлік мақсаттарын анықтауға көмектесу және өз әлеуеттерін толық ашуға түрткі болу, армандарына жетуге деген сенімін арттыру көзделеді.
Жастармен өткен кездесуде Түркістан облыстық қоғамдық даму басқармасы “Жастар ресурстық орталығы” КММ-нің “БАҚ пен қоғаммен байланыс” бөлімінің басшысы Ақтөре Мейіржанұлы модераторлық етті.
Кездесу спикерлері “Daryn.online” платформасының Түркістан облысы бойынша филиалының басшысы Бәйдібек Нұрланұлы, Түркістан облысы “Jastar Ruhy” жастар қанатының төрағасы Жансерік Бауыржанұлы, Түркістан облыстық “Жастар ресурстық орталығы” КММ-нің басшы орынбасары Пердебек Сержанұлы, Республикалық “Жас сарбаз” әскери қозғалысының Түркістан облыстық филиалының төрағасы Аружан Мақсатқызы өздерінің мазмұнды ойларымен, кәсіпкерлік пен қызмет жолындағы жетістіктерімен, жастарға қажетті пайдалы ақпараттары, өмірлік тәжірибелерімен бөлісті.
Сонымен қатар, кездесу барысында жастарға арналған мемлекеттік жұмыспен қамту бағдардамалары, “Бастау-Бизнес”, “Тәуелсіздік ұрпақтары”, “Best startup”, “Zhas project” секілді қайтарымсыз гранттар туралы, сондай-ақ, “Серпін” бағдарламасы жайлы «Жастарға қызмет көрсету және NEET санатындағы жастармен жұмыс жүргізу» бөлімінің басшысы Дінислам Нартайұлы мәлімет берсе, облыстық жастар орталығы тарапынан жыл бойына атқарылған жұмыстар, түрлі жобалар жөнінде «Талантты жастарды қолдау» бөлімінің басшысы Бағлан Бердібекұлы таныстырды.
Еркін форматта өткізілген кездесуде жастар өздерін қызықтырған мәселелер бойынша спикерлерге сұрақтар қойып, ұсыныс-пікірлерімен бөлісті. Кездесу соңында Бәйдібек Нұрланұлы өңіріміздің жастарына Момбек Әбдіәкімұлының “Күн тұтылған мезет” атты кітабының 1-2 томын сыйға тартты. Сонымен қатар Түркістан облысына қарасты аудан, қаланың мектеп бітіруші түлектеріне, яғни 50 оқушыға «Daryn.online» платформасының ҰБТ-ға дайындық курстарын тағайындау жоспарда бар екендігін жеткізді.
