«БАЛА ҚҰҚЫҒЫ – АДАМ ҚҰҚЫҒЫ» ТАҚЫРЫБЫНДА ЖИНАЛЫС ӨТТІ
Шымкент қаласы Білім басқармасына қарасты А.Байтұрсынов атындағы №50 мектеп-гимназиясында өзін-өзі басқару ұйымы — мектеп парламентінің ұйымдастыруымен 9–10 сынып оқушыларына арналған «Бала құқығы – адам құқығы» тақырыбында ақпараттық жиналыс өтті. Бұл іс-шара жасөспірімдердің құқықтық сауаттылығын арттыруға, олардың қоғамдық өмірдегі жауапкершілігін қалыптастыруға бағытталған маңызды қадам болды. Жиналыс мазмұны «Адал Азамат» біртұтас тәрбие бағдарламасының негізгі бағыттарымен толық үйлесіп, жас ұрпақтың құқықтық мәдениетін нығайтуды мақсат етті.
Іс-шараға Шымкент қаласы Полиция департаменті Тұран аудандық полиция басқармасының учаскелік инспекторлары, атап айтқанда, полиция капитандары Астрахан Қайрат және Сапархан Асылбек қатысты. Мамандардың қатысуы оқушыларға құқық бұзушылықтың салдарын, жасөспірім кезеңіндегі жауапкершіліктің маңызын кәсіби деңгейде түсіндіруге мүмкіндік берді. «Адал Азамат» бағдарламасы жасөспірімнің қоғам алдындағы жауапкершілігін сезінуге, заңға құрметпен қарауға үйретуді басты міндеттердің бірі ретінде қарастырады. Сондықтан бұл кездесудің маңызы өте зор. Жиналыс барысында оқушыларға бала құқықтары жөніндегі халықаралық және ұлттық құжаттар, олардың міндеттері, өзін қорғау тетіктері туралы ақпарат берілді. Әсіресе жасөспірімдердің мектепте, үйде, қоғамдық ортада қандай құқықтары бар екендігі, сондай-ақ сол құқықтармен қатар келетін міндеттер түсіндірілді. Бұл түсіндіру жұмысы жастардың өзіндік азаматтық ұстанымын қалыптастыруға, жауапты шешім қабылдауға тәрбиелейді. Полиция қызметкерлері құқық бұзушылықтың алдын алу бағытында нақты мысалдар келтіріп, жасөспірімдер арасында жиі кездесетін тәртіп бұзушылық түрлері, олардың құқықтық салдары туралы айтты. Құқықтық жауапкершілікті ерте жастан түсіну — болашақта әділ, заңды құрметтейтін азамат қалыптастырудың маңызды алғышарты. Бұл — «Адал Азамат» бағдарламасының өзегіне айналған бағыттардың бірі.
Киберқауіпсіздік мәселесі де жиналыстың негізгі тақырыптарының бірі болды. Полиция мамандары интернеттегі алаяқтық, жеке ақпаратты қорғау, қауіпсіз онлайн мінез-құлық нормалары туралы түсіндіріп, әлеуметтік желілерде сақтық танытудың маңызын атап өтті. Жасөспірімдердің ақпараттық мәдениеті жоғары болуы – олардың өздерін қауіптен қорғаудың маңызды тәсілі. Бұл да қазіргі қоғамда адал әрі жауапты азамат болудың маңызды талаптарының бірі. Жиналыс соңында оқушылар белсенділік танытып, мамандарға өздерін толғандырған сұрақтарын қойды. Құқықтық, психологиялық және қауіпсіздікке қатысты сұрақтар жан-жақты талқыланып, нақты әрі түсінікті жауаптар берілді. Бұл оқушылардың құқықтық тақырыпқа деген қызығушылығын арттырып, олардың саналы азамат ретінде қалыптасуына ықпал етті.
