ҚАЙЫРЫМДЫЛЫҚ ЖӘРМЕҢКЕСІ ҰЙЫМДАСТЫРЫЛДЫ

Шымкент қалалық білім басқармасына қарасты А.Байтұрсынов атындағы №50 мектеп-гимназиясында 12 қараша күні педагог-ұйымдастырушы Ә.Рахыштың жетекшілігімен, мектеп президенті Елназар Медина және мектеп парламенті мүшелерінің ұйымдастыруымен «Қайырымдылық жәрмеңкесі» өтті. Бұл шара — оқушыларды мейірімділікке, жомарттыққа, өзара қолдауға тәрбиелейтін маңызды қоғамдық іс. Жәрмеңке мазмұны «Адал азамат» біртұтас тәрбие бағдарламасына толық сәйкесіп, жас буынның адамгершілік қасиеттерін қалыптастыруға бағытталған нақты қадам болды.

Жәрмеңкенің басты мақсаты — оқушыларға жақсылық жасаудың қуанышын сезіндіру, өзгеге қамқорлық танытудың адамдық парыз екенін ұғындыру, ортада қолдау мәдениетін қалыптастыру. «Адал Азамат» бағдарламасы да жас ұрпақты рухани бай, шынайы мейірімді, қоғам алдындағы жауапкершілікті сезінетін тұлға ретінде тәрбиелеуді көздейді. Қайырымдылық шаралары бұл құндылықтарды практикада қалыптастырудың ең тиімді әдістерінің бірі. Іс-шарада оқушылар өз қолымен дайындаған түрлі тағамдарын жәрмеңкеге ұсынды. Бұл бір жағынан шығармашылық еңбекті, екінші жағынан еңбек құндылығын бағалауды үйретеді. Әр тағам — баланың өз ізгі ниетімен жасаған шағын еңбегі. Еңбектің қоғамға пайда әкелуі, өзгеге қуаныш сыйлауы — олардың дүниетанымына үлкен ықпал ететін маңызды тәжірибе. «Адал Азамат» бағдарламасында жауапты еңбекке баулу, еңбектің қадірін түсіндіру, бірлесе әрекет ету мәдениетін қалыптастыру негізгі міндеттердің бірі ретінде көрсетілген. Жәрмеңкеге барлық 9-сынып оқушылары және 8 “К”, 8 “Ж”, 8 “З” сыныптарының оқушылары белсене қатысты. Мұндай кең ауқымды қатысу — оқушылардың белсенді азаматтық позициясын, ортақ іске деген жауапкершілігін көрсетеді. Командалық әрекет, ұйымшылдық, өзара қолдау — болашақта саналы қоғам құруға үлес қосатын қасиеттер. Осындай шараларға қатысқан әрбір оқушы өз еңбегінің нәтижесін көріп, әлеуметке қызмет етудің маңызын түсінеді.

Жиналған қаражаттың мұқтаж отбасыларға бағытталуы жәрмеңкенің тәрбиелік салмағын арттыра түсті. Оқушылар өз іс-әрекетінің нақты нәтиже беретінін көріп, мейірімділіктің шынайы құндылығын сезінеді. Бұл – бала жүрегіне ізгілік ұрығын себетін ерекше сәт. «Адал Азамат» бағдарламасы қоғамға пайдалы әрекеттер арқылы адамгершілік қасиеттерді қалыптастыруды көздейді. Мейірімділік, жанашырлық, қайырымдылық — адал азаматтың негізгі сипаттарының бірі. Мектептегі мұндай шаралар осы құндылықтарды сіңіруге мүмкіндік береді.