ЖАСӨСПІРІМ ШАҚ — ЖАУАПТЫ КЕЗЕҢ
Шымкент қаласы білім басқармасына қарасты №97 жалпы орта білім беретін мектебінде 2025 жылдың 21 қарашасында жасөспірімдер арасында құқықтық сауаттылықты арттыруға бағытталған кең көлемді кездесу өтті. Іс-шара мүдделі мемлекеттік органдар мамандарымен бірлесіп ұйымдастырылып, ерте жүктіліктің, жыныстық және тұрмыстық зорлық-зомбылықтың, сондай-ақ құқықбұзушылықтың алдын алуға бағытталды. Бұл кездесу оқушыларды қорғау, қауіпсіз орта қалыптастыру және саналы азамат тәрбиелеу мақсатында жүзеге асырылып отырған «Адал азамат» біртұтас тәрбие бағдарламасының мазмұндық бағыттарымен ұштасады.
Кездесуге Шымкент қалалық Полиция департаменті Еңбекші аудандық басқармасы ЖПҚ ЖПБ-ның ювеналды полиция инспекторы, полиция капитаны Жұлдыз Тасқұлова, Шымкент қаласындағы «Sabi-med» медициналық орталығының гинеколог дәрігері Сания Нурадил, әлеуметтік қызметкер Айнұр Жалмырзаева, мектеп медбикесі А.Н. Мамытова, директордың тәрбие ісі жөніндегі орынбасарлары К.Ш. Өтегенова және Н.Б. Сарсенбекова, педагог-психолог Ж.Е. Архабаева және 8–9 сынып оқушылары қатысты. Шара аясында мамандар жасөспірімдер жиі кездесетін мәселелерді ашық талқылап, қауіпсіздік, денсаулық, жауапкершілік және құқықтық нормаларды сақтау туралы маңызды ақпарат берді. Полиция қызметкері жасөспірімдерге қатысты жиі орын алатын құқықбұзушылық түрлері, оның салдары және жауапкершілік туралы түсіндіріп, интернеттегі қауіпсіздік, қоғамдық орындардағы тәртіп, заң талаптарын сақтау жөнінде нақты мысалдар келтірді. Бұл бағыт жасөспірімдердің құқықтық мәдениетін қалыптастыруға серпін берді. Гинеколог маман жасөспірімдер денсаулығын қорғау, ерте жүктіліктің салдары, жеке гигиена және қауіпсіз мінез-құлық дағдылары туралы жан-жақты ақпарат ұсынды. Оның айтуынша, жасөспірімдік кезең – өмірлік маңызды шешімдер қабылданатын, дене мен психология белсенді түрде өзгеретін шақ. Сол себепті дұрыс ақпарат алу, өз денсаулығына жауапкершілікпен қарау және қажет сәтте көмекке жүгіну – әр жасөспірім үшін аса маңызды. Әлеуметтік қызметкер мен мектеп психологы тұрмыстық зорлық-зомбылықтың белгілері, зардаптары және көмек алу жолдары туралы түсіндірді. Олар оқушыларға қиын жағдайда жалғыз қалмау, сенімді ересектерге жүгіну, құқықтарын білу және өзін қорғау дағдыларын меңгерудің маңызын ерекше атап өтті. Бұл бағыт «Адал азамат» бағдарламасының қауіпсіздік мәдениетін қалыптастыруға арналған тарауларымен тығыз байланысты.
Кездесу барысында оқушылар өздерін толғандырған сұрақтарын қойып, өмірлік маңызы бар тақырыптар бойынша нақты әрі пайдалы жауап алды. Пікір алмасу ашық форматта өтіп, жасөспірімдер өз ойларын еркін жеткізуге мүмкіндік алды. Мамандардың тәжірибелік кеңестері оқушыларға дұрыс шешім қабылдауға, өз-өзін қорғауға және қауіпсіз мінез-құлық қалыптастыруға жол ашты. Іс-шара жасөспірімдердің жауапкершілік сезімін күшейтіп, олардың құқықтық сауаттылығын арттырып қана қоймай, өз денсаулығы мен қауіпсіздігіне саналы қарауға үйретті. №97 мектепте өткен бұл маңызды кездесу – жас ұрпақты жан-жақты қорғау мен тәрбиелеу бағытындағы жүйелі жұмыстың бір бөлігі ретінде өз жалғасын табатын құнды шара болды.
