АТА-АНАЛАРМЕН ТИІМДІ ҚАРЫМ-ҚАТЫНАС ОРНАТУ ТАҚЫРЫБЫНДА ЖИЫН ӨТТІ
Шымкент қаласы Білім басқармасына қарасты №97 жалпы орта білім беретін мектебінде «Оқушылардың тәрбиесі мен оқу үлгерімін арттыру, ата-аналармен тиімді қарым-қатынас орнату» тақырыбында сыныпаралық ата-аналар жиналысы өтті. Бұл жиын 2025–2026 оқу жылына арналған “Адал азамат” біртұтас тәрбие бағдарламасының отбасылық құндылықтарды нығайту, оқушының мінез-құлқын қалыптастыру және ата-ананың тәрбиедегі рөлін күшейту бағыттарымен үйлеседі. Мектеп пен отбасы арасындағы сенімді әріптестік – баланың жан-жақты дамуына ықпал ететін негізгі факторлардың бірі.
Жиналыстың басты мақсаты – оқушылардың тәртіп мәдениетін нығайту, оқу үлгерімін көтеру және ата-ананың жауапкершілігін арттыру. Бұл бағытта мектептің әкімшілік құрамы мен педагогикалық мамандар өзара ықпалдастықты дамыту жөнінде маңызды мәселелерді ортаға салды. Кездесу барысында бірқатар өзекті тақырып талқыланды. Алдымен І тоқсанның білім сапасының қорытындысы таныстырылып, оқушылардың оқу нәтижелерін жақсарту бойынша нақты ұсыныстар берілді. Жасөспірімдер арасындағы құқық бұзушылықтың, буллинг пен кибербуллингтің алдын алу мәселелері де ерекше назарға алынды. Мамандар зиянды әдеттердің алдын алу жұмыстарының отбасыдан басталатынын, ата-ананың бақылауы мен қолдауының маңыздылығын түсіндірді. Балалардың өмір қауіпсіздігіне арналған бөлімде «2ГИС» қосымшасындағы «Достар» функциясын қолдану тәртібі түсіндіріліп, балалардың қайда жүргенін бақылау, қауіпсіздік шараларын сақтау жөнінде кеңес берілді. Бұл ақпарат “Адал азамат” бағдарламасындағы қауіпсіздік мәдениетін қалыптастыру бағытымен тікелей үндес. Жиналыс барысында «Бақытты отбасы – бақытты бала» атты психологиялық тренинг өткізіліп, ата-аналарға бала тәрбиесіндегі тиімді қарым-қатынас, эмоциялық қолдау және отбасылық құндылықтарды нығайту тәсілдері ұсынылды. Педагог-психолог ата-ана мен бала арасындағы сенім атмосферасының маңызын атап өтті. Сонымен бірге мектептің ішкі тәртіп ережелері, мектеп формасын сақтау, сабаққа кешікпеу, оқу құралдарының толық болуы сияқты мәселелер бойынша түсіндіру жұмыстары жүргізілді. Интернетті қауіпсіз пайдалану, алаяқтықтан сақтану жолдары, әлеуметтік желілердегі жауапкершілік туралы да маңызды ақпарат берілді.
Жиналысқа қатысқан ата-аналар өз ұсыныс-пікірлерін ортаға салып, мектеппен бірлескен жұмысты одан әрі нығайтуға дайын екендігін көрсетті. Осындай кездесулер оқу орны мен ата-ана арасындағы байланысты күшейтіп, баланың тәрбиесі мен дамуында ортақ жауапкершілік қалыптастыруға үлкен серпін береді. №97 мектепте өткен бұл ата-аналар жиналысы – “Адал азамат” бағдарламасының құндылықтарын жүзеге асыруға бағытталған, оқушы тәрбиесінің сапасын арттыратын маңызды қадам болды.
