ӘЛЕУМЕТТІК МЕДИАНЫ САНАЛЫ ПАЙДАЛАНУ – «АДАЛ АЗАМАТ» ТӘРБИЕСІНІҢ МАҢЫЗДЫ БӨЛІГІ
Шымкент қаласы білім басқармасына қарасты мектептерде 11-сынып оқушыларымен «Әлеуметтік медиа және оның ықпалы» тақырыбында ашық кеңес және дөңгелек үстел ұйымдастырылды. Бұл іс-шара «Адал азамат» біртұтас тәрбие бағдарламасының негізгі бағыттарына сәйкес жүргізіліп, оқушылардың цифрлық сауаттылығын арттыруға, әлеуметтік желілерді саналы пайдалану мәдениетін қалыптастыруға бағытталды.
Қазіргі цифрлық дәуірде әлеуметтік медиа жастар өмірінің ажырамас бөлігіне айналды. Ол ақпарат алмасуға, өз ойын еркін жеткізуге, шығармашылықпен бөлісуге мүмкіндік береді. Сонымен қатар, дұрыс қолданылған жағдайда әлеуметтік медиа білім алуға, тұлғалық дамуға және пайдалы дағдыларды қалыптастыруға септігін тигізеді. Ашық кеңес барысында оқушылар әлеуметтік желілердің оқу процесіне, коммуникацияға және жеке тұлғалық өсуге әсерін талқылады, өзінің тәжірибелерімен бөлісті және түрлі платформалардың артықшылықтарын атап өтті. Алайда әлеуметтік медианың кері әсерлері де бар. Уақытты тиімсіз пайдалану, жалған ақпаратқа сену, интернет-тәуелділік және негативті пікірлер арқылы психологиялық күйге әсер ету сияқты қауіптер күнделікті өмірде жиі кездеседі. Оқушылар осы аспектілерді талқылап, әлеуметтік желідегі қауіпті жағдайларды қалай тануға, оларға жол бермеуге болатындығы жөнінде пікір алмасты. Дөңгелек үстел қатысушылары нақты мысалдар келтіріп, интернеттегі қауіпті контент пен жалған ақпаратты сүзгіден өткізу тәсілдерін талқылады. Іс-шара барысында педагогтар мен психолог мамандар онлайн кеңістікте қауіпсіздік ережелерін сақтау, жеке деректерді қорғау, кибербуллинг пен интернеттегі зорлық-зомбылықтан қорғану жолдары туралы кеңестер берді. Сонымен қатар, ақпаратты тексеру, жалған хабарлама мен қауіпті контентті анықтау дағдыларын дамытуға баса назар аударылды. Ашық кеңес нәтижесінде оқушылар әлеуметтік медианы тек ойын-сауық немесе қарым-қатынас құралы ретінде емес, сонымен бірге білім алу мен тұлғалық дамудың тиімді құралдары ретінде қолдануға үйренді.
«Адал азамат» бағдарламасының аясында ұйымдастырылған бұл іс-шара оқушыларға саналы шешім қабылдауды, өз әрекеті мен уақытына жауапкершілікпен қарауды, сондай-ақ қоғамдағы қауіпсіздік пен тәртіпке деген көзқарасты қалыптастыруға мүмкіндік берді. Әлеуметтік медианы дұрыс пайдалану тек жеке тұлғаның дамуына ғана емес, сонымен бірге мектептегі және қоғамдағы сенімді және мәдениетті қарым-қатынасты нығайтуға септігін тигізеді.
