ҚҰҚЫҚТЫҚ САУАТТЫЛЫҚТЫ АРТТЫРУ – ЖАУАПТЫ ТҰЛҒА ҚАЛЫПТАСТЫРУДЫҢ МАҢЫЗДЫ ҚАДАМЫ
Шымкент қаласы білім басқармасына қарасты №131 жалпы орта білім беретін мектебінде директор Жарасова Гүлжан Спандиярқызының басшылығымен құқықтық тәрбиеге бағытталған маңызды іс-шара ұйымдастырылды. Бұл жұмыс Қазақстан Республикасы Оқу-ағарту министрлігінің 2025 жылдың 19 қарашасындағы хатына сәйкес, «Заң және Тәртіп» идеологиясын ілгерілету жөніндегі жобаларды жүзеге асыру аясында өтті. 21 қараша күні «Полиция және балалар – бірге қауіпсіздік үшін» тақырыбында заң үйірмесінің мүшелерімен кеңейтілген түсіндірме сабағы жүргізіліп, оқушылардың құқықтық мәдениетін қалыптастыруға бағытталған маңызды ақпараттар берілді.
Кездесудің негізгі мақсаты – жасөспірімдердің балалар құқығы жөніндегі білімін кеңейту, олардың өмірде кездесуі мүмкін қауіп-қатерлердің алдын алу және өз құқықтарын дұрыс қорғау жолдарын түсіндіру. Оқушылардың құқықтық сауаттылығын арттыру арқылы күнделікті өмірде жауапкершілікпен әрекет ету, өз мүддесін қорғай білу және қажет жағдайда заңға жүгіне алу дағдылары қалыптасты. Полиция қызметкерлерімен жүргізілген түсіндірме барысында құқық бұзушылықтың салдары, қауіпсіздік ережелерін сақтаудың маңыздылығы, киберқауіпсіздік, қоғамдық орындардағы тәртіп және балалардың заң алдындағы құқықтары жайлы нақты мысалдармен түсіндірілді. Оқушылар ашық пікір алмасып, өздерін толғандырған сұрақтарына жауап алды. Диалог түрінде өткен бұл жұмыс олардың құқықтық ойлауын дамытуға және заңға деген құрметін арттыруға ықпал етті. Іс-шара «Адал азамат» біртұтас тәрбие бағдарламасының міндеттерімен толық үндеседі. Бағдарлама жас ұрпақты демократиялық құндылықтарды құрметтейтін, өз құқығы мен міндетін білетін, елінің заңдарына жауапкершілікпен қарайтын тұлға ретінде қалыптастыруды көздейді. №131 мектепте өткен түсіндірме жұмыстары осы бағыттағы тәрбиелік үдерісті күшейтіп, оқушылардың құқықтық мәдениетін жаңа деңгейге көтерді.
Мұндай кездесулер жасөспірімдердің құқықтық қауіпсіздігіне деген түсінігін кеңейтіп қана қоймай, олардың санасында заңға сай өмір сүру нормаларын қалыптастырады. Әрбір оқушы өз құқығын білетін, қажет жағдайда өзін қорғай алатын, қоғам алдындағы жауапкершілігін түсінетін азаматқа айналған сайын ел болашағы да сенімді болмақ. Бұл бағыттағы шаралар алдағы уақытта білім ордасында жалғасын таппақ.
