«ДАРБАЗА — МАҚТААРАЛ» ТЕМІРЖОЛ ЖЕЛІСІНІҢ ҚҰРЫЛЫСЫ ҚАРҚЫНДЫ ЖҮРГІЗІЛУДЕ
Түркістан облысында транзиттік әлеуетті арттыру және өңірдің әлеуметтік-экономикалық дамуына серпін беру мақсатында стратегиялық маңызы бар «Дарбаза — Мақтаарал теміржол желісінің құрылысы» жобасы жүзеге асырылуда. Жобаны толық іске қосу 2026 жылдың желтоқсан айына жоспарланған. Құрылыс алаңында атқарылып жатқан жұмыстар қатаң бақылауға алынып, жоғары сапа мен белгіленген мерзімге сәйкес аяқталуы қамтамасыз етілуде.
Жобаның құрылысын «Қазақстан темір жолы» ҰК» АҚ тапсырысымен «Integra Construction KZ» ЖШС жүзеге асыруда. Түркістан облысының әкімі Нұралхан Көшеров жобаның барысын тексеру мақсатында «Қазақстан темір жолы» ҰК» АҚ құрылыс жөніндегі басқарушы директоры Марат Исқалиев және жобаны жүзеге асырушы мердігер компания өкілдерімен кездесті. Кездесу барысында құрылыс жұмыстарының ағымдағы жағдайы баяндалып, өзекті мәселелер мен оларды шешу жолдары талқыланды. Облыс әкімі жауапты тұлғаларға құрылыс жұмыстарын жеделдетіп, тапсырмаларды белгіленген мерзімде әрі сапалы орындауды қатаң тапсырды. Нұралхан Көшеров атап өткендей, Мемлекет басшысы Қасым-Жомарт Тоқаев Ұлттық құрылтайдың V отырысында «Дарбаза — Мақтаарал» теміржол желісінің құрылысын осы жылдың соңына дейін аяқтау жөнінде нақты тапсырма берген. Бұл жобаның маңызы стратегиялық: ол өңірдің транзиттік әлеуетін арттырып, экономикалық дамуына оң әсерін тигізеді. Сонымен қатар, станциялардың сәулетін қайта қарап, шығыс үлгісінде жобалау да қарастырылып отыр.
Жобаның құрылыс барысы қарқынды жүргізілуде. Қазіргі уақытта аяқталған жер қазу жұмыстарының жалпы көлемі 9,1 млн текше метрді құрайды. 19,8 шақырымға рельсті шпал торы төселіп, көпірлер мен өткелдер, су құбырлары және жасанды құрылымдардың монтаждау жұмыстары қарқынды атқарылуда. Құрылысқа 560-тан астам адам мен 400-ге жуық арнайы техника жұмылдырылған. Теміржол желісінің ұзындығы 172 шақырымды құрайды. Жаңа бағыт «Сарыағаш» өткізу пунктінің жүктемесін азайтып, Сарыағаш, Келес, Жетісай, Мақтаарал және Шардара аудандарын байланыстырады. Бұл бағыттың өткізу қабілеті едәуір артылып, магистральдық көлік, кедендік және шекаралық инфрақұрылымның дамуына мүмкіндік береді. Жоба өңірдің әлеуметтік-экономикалық дамуына серпін беріп, жаңа өндірістердің ашылуына және қосымша жұмыс орындарының құрылуына ықпал ететін стратегиялық бастама ретінде бағаланып отыр.
Жобаның негізгі мақсаты — «Дарбаза — Мақтаарал» жаңа теміржол желісі арқылы жүк және жолаушылар тасымалының көлемін арттыру, транзиттік бағыттарды ашу және Түркістан — Шымкент — Ташкент учаскесіндегі өткізу қабілетін тәулігіне 35 жұп поезға дейін ұлғайту. Бұл халықаралық және аймақаралық тасымалдауды жеңілдетіп, өңірдің логистикалық әлеуетін күшейтеді. Жиын барысында Облыстық жер қатынастары басқармасының басшысы Ерғали Тілеген және аудандар әкімдері жер телімдерін мемлекет мұқтаждығына алу, сатып алу және құрылысқа дайындау жұмыстары туралы ақпарат берді. Мұндай шаралар жобаны қысқа мерзімде іске асыруға мүмкіндік беріп отыр.
Айта кетейік, Түркістан облысындағы «Дарбаза — Мақтаарал» теміржол жобасы Мемлекет басшысының 2023 жылғы 1 қыркүйектегі «Әділетті Қазақстанның экономикалық бағыты» атты Жолдауына сәйкес жүзеге асырылуда. 2025 жылдың соңында жобаның мемлекеттік сараптамадан оң қорытынды алғаны белгілі болды. Бұл факт жобаның сапалы және заңды тұрғыдан толық үйлесімділігін дәлелдейді. Қорытындылай келе, «Дарбаза — Мақтаарал» теміржол желісі Түркістан облысының экономикалық және әлеуметтік дамуына айрықша үлес қосатын стратегиялық жобалардың бірі болып отыр. Ол өңірдің транзиттік мүмкіндіктерін кеңейтіп, жаңа өндіріс орындарының ашылуына және халыққа тұрақты жұмыс орындарының құрылуына мүмкіндік береді. Жоба толық іске қосылған кезде, Түркістан облысының транспорттық инфрақұрылымы едәуір жақсарып, өңір логистикалық орталыққа айналатыны күтілуде.
