МАҚТААРАЛДА ҚЫРЫҚҚАБАТ ӨНІМІН САТУҒА ДИСТРИБЬЮТОР КӨМЕКТЕСЕДІ

Мақтаарал ауданының еңбекқор диқандары биыл 351,5 гектар жерге қырыққабат егіп, қазірдің өзінде 3584 тонна өнім алып үлгерді. Әрине, еліміздегі төтенше жағдай мен күллі әлем халқын үйінен шығармай қойған пандемия қырыққабат өнімінің сатылуына кедергі жасап, нарықтағы бағасын күрт төмендетіп жіберді.

Бұған дейін шаруалар еліміздегі барша блок-бекеттерден кедергісіз өту үшін облыстық ауыл шаруашылығы басқармасы тарапынан барлық облыстармен меморандум түзіліп, «Біз біргеміз!» логотипін жапсырып алу арқылы өту мүмкіндігі жаратылған еді. Міне, енді облыс әкімі Өмірзақ Шөкеевтің тағы бір тапсырмасымен Мақтаарал ауданында қырыққабат өнімін өткізу бойынша арнайы дистрибьютор тағайындалып, шаруалардың өнімін сатуға көмек берілетін болады.  

Бұл туралы Мақтаарал ауданы әкімінің баспасөз қызметі    мәлімдейді.

Бүгін Мақтаарал ауданының әкімі Бақыт Асанов қырыққабат еккен шаруалардың ахуалынан хабар алып, оларға қырыққабат өнімін өткізу бойынша ауданымыздың дистрибьюторы болып тағайындалған жеке кәсіпкер, аудандық мәслихаттың депутаты Берік Шәмпиевті таныстырды.

«Құрметті алтын қолды ауданымыздың диқандары! Егер, Сіздің еккен қырыққабатыңыз пісіп дайын болса, алайда өніміңізді сату бойынша мәселе туындап жатса, ауданымыздың дистрибьюторы Берік Шәмпиевке хабарласуға болады. Ол кісі Сіздердің өніміңізді экспорттау немесе басқа облыстарға алып барып сату үшін құжаттарды рәсімдеуге көмектесіп, жүк көліктерін тауып беруге мүмкіндіктер жасайтын болады» — деді Бақыт Насырханұлы.

Аудан әкімі таныстырған дистрибьютор Берік Шәмпиетің телефон нөмірі – 87012920000 айта кетейік.