БАСҚАРМА БАСШЫСЫ СОЛТҮСТІК САЯЖАЙ ТҰРҒЫНДАРЫНА ТҮСІНДІРМЕ ЖҰМЫСТАРЫН ЖҮРГІЗДІ
Шымкент қаласының әкімі Мұрат Әйтеновтің азаматтарды қабылдауы кезінде Солтүстік саяжай тұрғындары табиғи газ мәселесі бойынша шағымданған болатын.
Осыған байланысты, Энергетика және инфрақұрылымды дамыту басқармасының басшысы Боранбай Булатбеков кезекті рет солтүстік саяжайлықтармен кездесіп, түсіндірме жұмыстарын жүргізді.Солтүстік саяжай елді мекенін табиғи газбен қамту құрылысы ағымдағы жылдың мамыр айында басталған. Кездесу барысында басқарма басшысы жыл соңына дейін рет-ретімен тұрғын үйлерді газге қосу жұмыстары жүргізілетіндігін айтты. Сонымен қатар, тұрғындардың өтініші бойынша жобадан тыс, қосымша электр бағаналарын орнату жұмыстары жүргізіліп жатыр.
Айта кету керек, Абай ауданына қарасты Солтүстік саяжай елдімекенін сапалы электр қуатымен қамту толығымен аяқталып, тұрғын үйлерді мемлекеттік желіге қосу үшін абоненттеу жұмысы басталды. Қала әкімі аумаққа арнайы барып, тұрғындармен кездесті. Кездесуде мәслихат депутаттары мен БАҚ өкілдері де болды. Құрылыс барысында 4 773 электр бағанасы мен 70 трансформатор орнатылып, 145 шақырым электр желілері тартылды.
Бұған дейін Солтүстік саяжай елдімекені тұрғындары жекеменшік желіден сапасыз электр қуатын тұтынып келген болатын. Ең бастысы, осыған дейін тұрғындарымыз 1кВ электр қуаты үшін 30-35 ₸ төлеп келген болса, қазір ол баға арзандап, 17,96 ₸ түсті. Енді тұрғындар қажетті құжаттарды «ОңтүстікЖарықТранзит» ЖШС мекемесіне өткізу арқылы мемлекеттік желіден электр тұтына алады. Жалпы жұмыс нәтижесінде, Солтүстік саяжайдағы 5 784 абонент сапалы электр қуатымен қамтылмақ. Айта кетейік, биыл сапалы электрмен қамту мақсатында 6 елдімекенде құрылыс жұмысы қарқынды жүруде. Жыл қорытындысымен, Достық, Тұран, Нұртас, Сәуле, Жаңаталап елдімекендерінде құрылыс жұмысы аяқталып, 22 мыңға жуық халық сапалы электрмен қамтылуға мүмкіндік алады. Биылғы қамтылу көрсеткіші 98 пайызға болса, 2023 жылы мегаполистегі барлық елдімекендер 100 пайыз сапалы электр қуатымен қамтылатын болады. Бұдан бөлек, шалғайда жатқан елді мекендер мен шағынаудандардың ішкі орамдық көшелері де күрделі жөндеуден өтіп, асфальтбетон төселуде. Нәтижесінде қаладағы жақсы және қанағаттанарлық көшелердің үлесі артпақ.
