ШЫМКЕНТТЕ «ӘЙЕЛДІҢ ЕЛ ДАМУЫНДАҒЫ РӨЛІ» ФОРУМЫ МӘРЕСІНЕ ЖЕТТІ
Шымкент қаласында «Әйелдің ел дамуындағы рөлі» тақырыбында нәзікжанждылар бас қосты, деп хабарлайды Uakit.kz.
Шымкентте «Жастар ресурстық орталығында» «AMANAT» партиясының Саяси менеджмент академиясы мен партияның Шымкент қалалық филиалы ұйымдастыруымен әйелдер форумы өтті. «Әйелдің ел дамуындағы рөлі» тақырыбында бас қосқан нәзікжандылар қазіргі замандағы әйел адамның рөлін, жүйелік мәселелерді шешудің жалпы тәсілдерін әзірлеу бойынша пікір алмасып, нақты ұсыныстарды талқылады.
Сондай-ақ, қоғамдағы әлеуметтік-демографиялық прогресті қамтамасыз етудегі әйелдердің рөлін талқылау, экономикалық өсудің жаңа үлгілеріне көшу, денсаулық сақтау мен білім беруді дамыту, әйелдер арасында қаржылық сауаттылық проблемаларын шешу және өзін-өзі бағалауды, жеке тұлға ретінде өзін-өзі дамытуды арттыруға арналды.
Жиында ҚР Парламентінің Мәжіліс депутаты, Әлеуметтік-мәдени даму комитетінің мүшесі Ж.Сүлейменова, «АMANAT» партиясы Шымкент қалалық филиалының Атқарушы хатшысы Ж.Бектаева, Шымкент қаласының кәсіпкерлер палатасы жанындағы Іскер әйелдер кеңесінің төрағасы А.Архабаева, қоғам қайраткері, саясаттанушы, Қазақстан Республикасы Президентінің жанындағы Ұлттық қоғамдық сенім кеңесінің мүшесі Б.Жандосова, ҚР Қаржы нарығын реттеу және дамыту агенттігінің Шымкент қаласындағы басқармасының бас маманы С.Аталықова, «Қостанай қаласының №3 емханасы» КМК гинекология меңгерушісі Г.Қожагелдина сөз сөйлеп, баяндама жасады.
««АMANAT» партиясы қоғамдағы, биліктегі, бизнестегі әйелдердің рөліне ерекше көңіл бөлетінін, қолдау білдіретінін мақтанышпен айта аламын.
Жалпы, өзім жетекшілік ететін партияның Шымкент қалалық филиалы жанында 11 қоғамдық кеңес құрылып, түрлі салалар бойынша жұмыстар атқарылуда. Осы кеңестің құрамында әйелдердің үлесі орасан. Жалпы, жетекші партияның сайлауалды тізіміне әйелдер мен жастар үшін 30%-пайыздық квота енгізу қажеттігі заңдық тұрғыдан қарастырылған», — деді өз сөзінде Жанар Әлібекқызы.
