ТОЛҒАҚТЫ ТҮЙІН ШЕШІМІН ТАУЫП КЕЛЕДІ
Шымкент қаласына қарасты шалғайда жатқан елді мекендер мен шағынаудандардың күрделі мәселелері шешімін тауып келеді. Инженерлік инфрақұрылым саласындағы жұмыстар жоғары қарқынмен жүзеге асып келеді. Бүгінде бірқатар өңірлердің толғақты мәселесінің түйіні ағытылды. Бүгінде үшінші мегаполис тұрғындарының 93 пайызы табиғи газбен қамтылған. Шаһардағы 81 елді мекеннің 42-сі толық, 31 елді мекенде газ жартылай берілген. Бүгінде қалған елді мекендерге газ тарту мақсатында тиісті жобалар жүзеге асырылуда.
Ақтасқа газ құбырын тарту жұмысының 65 пайызы орындалған болса, осы жылдың тамызына дейін аяқтап, нәтижесінде 225 үй көгілдір отынға қол жеткізбек. Ақтас-2 шағынаударнында құрылыстың 60 пайызы аяқталған. Нысан құрылысы үшін 223,6 млн теңге қаражат қаралып, қазірге дейін оның 120 млн теңгесі игерілді. Қазіргі сәтте ұзындығы 16,5 шақырым болған ішкі жүйелерге құбыр тартылуда. Өткен жылдың соңында басталған жоба тамызға дейін пайдалануға берілмек. Нәтижесінде елді мекендегі 160 абонент табиғи газбен қамтылады. Қазіргі уақытта қалада 1 магистралды және 10 елді мекенде ішкі орамдық газ құбырының құрылысы жүргізілуде. Жыл соңына дейін Тұран магистралды газ құбыры мен 8 елді мекенде құрылыс жұмыстар аяқталып, пайдалануға беріледі. Нәтижесінде 20 мыңға жуық тұрғынға табиғи газ беріліп, қамтылу көрсеткіші 94,7 пайызға жетеді. 2025 жылы қала тұрғындарын 100 пайыз көгілдір отынмен қамту жоспарланып отыр. Қазіргі уақытта қаладағы көгілдір отын тапшылығы мәселесі шешілген. Дегенмен газ құбырын тарту мен көгілдір отын жеткізу ісін толықтай шешу үшін уақыт керек. Десе де қала әкімі Мұрат Әйтенов 2025 жылда аталған саладағы түйткілдердің түйіні ағытылып, мәселе шешілетінін жеткізді. Қазіргі уақыттың өзінде қаладағы бірқатар елді мекендер мен шағынаудандарда құрылыс жұмыстары жүріп жатыр. Сапа бақылауда. Басты мақсат — тұрғындарға қажет көгілдір отынды уәде еткен уақытта сапалы түрде жеткізу.
