АҚЖАЙЫҚТЫ КӘРІЗБЕН ҚАМТУ ЖҰМЫСТАРЫ ЖҮРГІЗІЛУДЕ
Бүгінде Шымкент қаласы үлкен құрылыс алаңына айналған. Көпқабатты үйлер бой көтеруде. Сонымен қатар инженерлік инфрақұрылыммен қамту ісі де қарқынды түрде жүзеге асырылып жатыр. Атқарылған жұмыстар жайын Шымкент қаласының әкімі Мұрат Әйтенов арнайы тексеріп, олқылықтар болса, жедел шешуді тапсырып келе жатыр. Ағымдағы жылы шаһар басшысы Ақжайық шағынауданын инжинерлі-инфрақұрылыммен қамту барысын тексеріп, қажет шараларды жедел көру керегін тапсырған болатын. Мұнда кәріз жүйесінің құрылысы жүргізілуде.
Сметалық жобаға сәйкес, ұзындығы 22,1 шақырым кәріз жүйесі салынып, ол үшін бюджеттен 686,1 млн теңге қаралып отыр. Жұмысты аяқтау мерзімі 2023 жылдың тамызына жоспарланған. Пайдалануға берілгенде шағынаудандағы 4200 үй кәріз жүйесіне қосылады. Жаңа кәріз жүйесін шағынаудан халқымен бірге кәсіпорындар, мектеп пен балабақшалар да пайдаланады. Ақжайық шағынауданында 35 көпқабатты, қалғаны жеке тұрғын үйлер. Ауыз су, электр жарығы және табиғи газбен толық қамтылған. Қазір онда 3 мектеп пен 12 балабақша бар. Өткен жылы 8 балалар ойын алаңшасы мен 2 спорт алаңшасы салынып, пайдалануға берілген. Биыл 10 спорт алаңшасының құрылысы жүргізілуде. Шағынауданда осы жылы 13 көше орташа жөндеуден өтпек. Атап айтқанда Жағатай көшесінің жалғасы, Оразбай ата, Бетеге жалғасы, Жағатай көшесінің жалғасындағы атауы жоқ көше, №12 көше, Сарбаз көшелеріне асфальт төселеді. Жоспарға сәйкес, жыл сайын орташа жөндеу жұмыстары қаланың орталық көшелері ғана емес, ауданның ішкі орамдық көшелері де қамтылады. Бүгінде жоспарланған 308 көшенің 145 көшесі жөндеуден өтіп, ел игілігіне пайдалануға берілді. Сонымен қатар, бүгінге дейін Ақжайықта 8 көше жарықтандырылған. Биыл Балқарағай, Асфендияров көшесі жарықтанса, 2023 жылы Байсбаев пен Қарасай, 2024 жылы Спанов пен Уали ата көшелеріне кешкі шам орнатылады. Айта кету керек, биыл үшінші мегаполиске қарасты шағынаудандар мен елді мекендерге инженерлік инфрақұрылым тарту мәселесіне айрықша назар аударылып отыр. Демек шалғайдағы әлеуметтің мәселесі шешілер күн де алыс емес.
