ЖАСТАРДЫ ЖҰМЫСПЕН ҚАМТУ: БОС ЖҰМЫС ОРЫНДАРЫ ЖӘРМЕҢКЕЛЕРІНІҢ МАҢЫЗЫ ЗОР
Кез келген қоғамда жастардың жан-жақты дамуына айрықша назар аударылары белгілі. Өйткені қоғамның алға жылжуы, елдің гүлденуі және экономиканың дамуы бүгінгі өскелең ұрпақтың тәлім-тәжірибесіне тікелей байланысты. Сондықтан олардың арасында туындаған мәселе – тұтас елдің мәселесі саналады. Жасыратыны жоқ, Шымкент қаласында бұл бағытта қыруар іс атқарылып жатыр. Қалада жастарды қолдауға бағытталған бағдарламалар жан-жақты насихатталуда.
Бұдан бөлек, үшінші мегаполисте 245 мыңнан аса жастар болса, оларға қолдау көрсету мақсатында 4 ауданнан жастар ресурстық орталықтары ашылып, жыл басынан бері 21 мың жасқа қызмет көрсеткен. Одан бөлек, 9 ірі сауда орталығында жастар ұйымдары құрылған. Олар кәсіпкерлікті дамыту және заңдастыру, спорттық шараларға тарту сынды бағытта жұмыс жасайды. «Профновигация» жобасы аясында мектеп оқушыларына кәсіптік бағдар жұмыстары бойынша 56 кездесу мен семинар-тренингтер, кәсіпорындарға экскурсиялар ұйымдастырылды. Жастарды жұмыспен қамту мақсатында NEET санатындағы жастар туралы тұжырымдама әзірленіп, бекітілді. Жыл басынан 27 рет бос жұмыс орындар жәрмеңкесі ұйымдастырылып, 4 100 жас қамтылды. «Мобильді топ» 48 шалғай елдімекенді аралап 15 000 астам жасқа ақпараттық түсіндірме жұмыстары жүргізілді. 6 828 жас мемлекеттік бағдарлама аясында жұмыспен қамтылды. Оның ішінде 162 жас алғашқы жұмыс орындары, 123 жас әлеуметтік жұмыс орындар, 3 623 жас тұрақты жұмыспен, 996 жастар практикасымен, 1 924 жас қоғамдық жұмыс орындарына жолданған. Қала әкімі Мұрат Әйтеновтың өзі аталған саладағы жұмыстарды күшейтуді тапсырған болатын. Нақтырағы «Жастарды кәсіпкерлік іске баулу, жұмысқа орналастыру, оларға заманауи технологияны меңгерту күн тәртібінен түспей отырған өткір мәселелердің бірі. Әлеуметтік мәселесін шешу үшін, алдымен жұмыс мәселесін шешу қажет. Жұмыс істеймін деген жасқа мүмкіндік көп. Соны түсіндіру, жан-жақты қолдау көрсету – міндетіміз. Жастар орталықтарында осы бағыттағы жұмыстар күшейтілсін» деді шаһар басшысы бір сөзінде. Айта кету керек, соңғы уақытта жастардың кәсіп бастауы үшін мемлекет тарапынан игі бастамалар көтеріліп, жүзеге асырылып келе жатыр. Қазіргі уақытта аталған көмектің игілігін көріп, кәсібін дөңгелетіп отырған жастар да баршылық.
