BRENT МАРКАЛЫ МҰНАЙ БАҒАСЫ 9 МАМЫРДАН БЕРІ АЛҒАШ РЕТ 63 ДОЛЛАРҒА ДЕЙІН ҚҰЛДЫРАДЫ
Трамптың тарифтік саясатына қатысты белгісіздік пен ОПЕК+ тарапынан мұнай өндіру көлемінің артуы күтіліп отырғаны бағаларға қысым көрсетіп отыр, деп жазды Қазақстан қаржыгерлер қауымдастығы.
Валюта нарығы
Бейсенбі күнгі сауда қорытындысы бойынша USD/KZT бағамы 3,31 теңгеге төмендеп, 1 доллар – 509,12 теңге болды. Бұл ретте сауда көлемі 248,4 млн долларға дейін артты, алдыңғы сессияда ол 197,9 млн доллар болған.
Жалпы алғанда сыртқы фон бейтарап болғанымен (мұнай бағасы мен доллар индексінің қатар өсуі), ұлттық валютаның нығаюына ішкі факторлар көбірек әсер еткен болуы мүмкін.
Теңгеге қолдау көрсеткен ықтимал факторлар:
• Ұлттық банк алдағы отырыста базалық мөлшерлемені өзгеріссіз қалдырады деген үміт;
• Ұлттық банк, экспорттаушылар және Қаржы министрлігінің (КГС) шетел валютасын сату көлемі кәсіпорындар мен халық тарапынан болған сұраныстан асып түсті;
• Сонымен қатар, қазақстандық теңгенің тарихи түрде тығыз байланысы бар ресей рублінің нығаюы да оң әсер етуі мүмкін.
Мұнай
Мұнай бағасы төмендеу үрдісін көрсетіп отыр. Бұған ОПЕК+ өндірісті арттырады деген күтілістер мен Трамптың тарифтік саясатына байланысты белгісіздік әсер етуде.
Осылайша, бейсенбі күні Brent маркалы мұнайдың бағасы 63,4 долларға дейін (-1,5%) төмендеді, ал қазір 63 доллардан төмен түсті (-0,5%).
Сонымен қатар, Халықаралық энергетика агенттігі Қытайдағы мұнайға сұраныстың төмендеуі туралы ескерту жасады.
Бұған дейін біз хабарлағандай, Халықаралық валюта қорының (ХВҚ) болжамына сәйкес, егер мұнай бағасы төмен деңгейде сақталса, 2025 жылы Қазақстанда бюджет тапшылығы мен төлем балансының дефициті ұлғаюы мүмкін.
Халықаралық валюта қорының пікірінше, Қазақстанда қызмет көрсету, көлік, құрылыс, өңдеу және өндіру өнеркәсібі секторларындағы жоғары белсенділік аясында жоғары экономикалық өсу сақталып отыр. Сондай-ақ, мемлекеттік инфрақұрылымдық инвестициялардың өсуі мен цифрлық технологиялар, ЖИ, агроөнеркәсіптік кешен және логистика саласындағы инвестициялық жобалардың іске асырылуы байқалады.
