МҮМКІНДІГІ ШЕКТЕУЛІ АЗАМАТТАРДЫҢ МӘСЕЛЕЛЕРІ НАЗАРДАН ТЫС ҚАЛМАҚ ЕМЕС
«AMANAT» партиясы Шымкент қалалық филиалының Қоғамдық қабылдау бөлмесінде кезекті қоғамдық қабылдау өтті. Бұл жолғы іс-шара «Кедергісіз келешек» және «Құқықтық көмек» партиялық жобалары аясында ұйымдастырылды. Қоғамдағы әлжуаз топтардың құқықтарын қорғау мен оларға нақты қолдау көрсету – партия жұмысының басым бағыттарының бірі болып келеді.
Қабылдауды Халықты әлеуметтік қорғау саласындағы реттеу және бақылау комитетінің Шымкент қаласы бойынша департамент басшысы Руслан Тұңғышбаев жүргізіп, келген азаматтардың мәселелеріне ерекше назар аударды. Бұл қабылдаудың басты ерекшелігі – мүгедектікке шығу және мүгедектік тобына қатысты сұрақтардың кеңінен көтерілуі болды. Қоғамдық қабылдауда көтерілген негізгі сұрақтар — мүгедектікке шығу рәсімінің күрделілігі, қайта тексеру және мүгедектік тобының ауыстырылуы, комиссия шешімдеріне келіспеушілік, мемлекеттік жәрдемақылар мен оңалту қызметтеріне қолжетімділік. Бұл сұрақтардың жиі көтерілуі – қазіргі әлеуметтік қорғау жүйесіндегі олқылықтар мен ақпараттық теңсіздіктің айқын көрінісі. Тұрғындардың бір бөлігі заңнаманы толық білмейді, ал енді бір бөлігі жүйенің баяу әрекетіне немесе бюрократиялық кедергілерге тап болған. Руслан Тұңғышбаев әрбір арыз-шағымды тыңдап, тиісті құқықтық түсіндіру жұмыстарын жүргізді, заң шеңберінде шешілу жолдарын нақтылап берді. Ол кейбір сұрақтардың денсаулық сақтау саласының құзыретіне жататынын, ал кейбір мәселелер азаматтардың жеке жауапкершілігімен байланысты екенін ашық айтты. Мүгедектік мәселесіне қатысты көтерілген арыздардың көп болуы – әлеуметтік қолдау жүйесінің жан-жақты реформалауды қажет ететінін аңғартады. Тұрғындардың құқықтық сауаты төмен болған жағдайда, олар өзіне тиесілі мүмкіндіктерден қағылып отыр. «AMANAT» партиясының «Кедергісіз келешек» жобасы мүмкіндігі шектеулі жандардың өмір сүру сапасын арттыруға бағытталған. Ал «Құқықтық көмек» жобасы – құқықтық білім беру мен нақты кеңес беру алаңы. Бұл екі жобаның біріктірілуі арқылы партия әлеуметтік әлсіз топтарға нақты қолдау көрсетіп отыр. Қоғамдық қабылдау – мәселені шешудің бірінші кезеңі ғана емес, жүйелік кемшіліктерді анықтаудың пәрменді құралы. Тұрғындардың өтініштері негізінде жауапты мекемелерге ұсыныстар жолданып, кейбір мәселелер департаменттің бақылауына алынды.
Бұл қоғамдық қабылдау – билік пен азаматтар арасындағы тиімді диалогтың тағы бір жарқын мысалы. Мүгедектікке шығу, әлеуметтік қолдауға қол жеткізу, құқықтық сауатты болу – тек жекелеген азаматтардың ғана емес, тұтас қоғамның ортақ мүддесі. «AMANAT» партиясы осы бағыттағы жұмысын жүйелі түрде жалғастырып, әлеуметтік әділеттілік пен тең құқықты қоғам құру жолында нақты істер атқаруда. Ал азаматтар тарапынан ашықтық пен қолжетімділікке сұраныс артқан сайын, мұндай қоғамдық қабылдаулардың маңыздылығы да өсіп келеді. Бұл – нағыз «халық үніне құлақ асатын мемлекет» тұжырымдамасының жүзеге асуы.
