АБАЙ КҮНІ РУХАНИ-МӘДЕНИ МЕРЕКЕГЕ АЙНАЛДЫ
Шымкент қаласында ұлы ойшыл, ағартушы Абай Құнанбайұлының 180 жылдық мерейтойына арналған ауқымды рухани-мәдени іс-шаралар өтті. Мерекелік бағдарлама қала тұрғындары мен қонақтарын тарихи тұлғаның бай мұрасымен тереңірек таныстыруды, оның шығармашылық мұрасының заманауи қоғамдағы мәнін айшықтауды мақсат етті.
Айтуды күн Абай саябағындағы ескерткішке гүл шоқтарын қою рәсімінен басталды. Бұл – халықтың ұлы ақынға деген құрметінің және оның есімін ұрпақ жадында мәңгі қалдыру ниетінің айқын көрінісі. Шараға Шымкент қаласының әкімі Ғабит Сыздықбеков, зиялы қауым өкілдері, ғалымдар, саяси партиялар мен қоғамдық ұйымдардың жетекшілері, Қазақстан халқы Ассамблеясы мен этномәдени бірлестіктердің мүшелері және белсенді жастар қатысты. Гүл қою рәсімінен кейін мерекелік бағдарламаның ерекше сәттерінің бірі – бүлдіршіндердің Абай өлеңдерін мәнерлеп оқуы болды. Бұл көрініс тыңдармандарға ерекше әсер қалдырып, ұрпақ сабақтастығы мен ұлттық әдебиетке деген сүйіспеншіліктің жаңа буын бойында қалай қалыптасып келе жатқанын көрсетті. Қатысушылар әрі қарай 2009 жылы ашылған «Хакім Абай» музейін аралап, ақынның өмір жолы, шығармалары, аудармалары және заманының тұрмыс-тіршілігімен танысты. Музей экспозициясы келушілерді XIX ғасырдың тарихи контексіне енгізіп, Абайдың қазақ қоғамындағы реформаторлық рөлін жан-жақты сезінуге мүмкіндік берді. Содан кейін мәдени шара Көрме орталығында жалғасын тауып, «Ұлы Даланың Ұлы Абайы» атты көрме ұсынылды. Мұнда Абайдың жеке заттары, сирек қолжазбалар, фотосуреттер және ақын шығармаларының түрлі тілдердегі басылымдары қойылды. Бұл экспозиция ақын мұрасының ауқымын, оның ұлттық қана емес, әлемдік деңгейдегі рухани құндылық екенін айқындады.
Мерекелік күннің соңында республикалық «Абай әлемі» байқауының қорытындысы шығарылып, жеңімпаздар марапатталды. Сондай-ақ қаладағы мәдениет мекемелерінде концерттер, әдеби кештер мен поэзия сағаттары ұйымдастырылды. Бұл іс-шаралар қала тұрғындарына Абай мұрасын әр қырынан танып, өнер мен әдебиеттің тоғысқан сәттерін тамашалауға мүмкіндік берді. Абай Құнанбайұлының 180 жылдығына арналған бұл мерейтойлық іс-шаралар тек бір күндік мереке емес, рухани жаңғыру мен ұлттық сананы нығайтудың маңызды кезеңі ретінде есте қалды. Ақынның даналыққа толы сөздері мен адамгершілік идеялары бүгінгі қоғамда да өзекті болып қала бермек, ал осындай мәдени бастамалар оның ұлы есімін келешек ұрпаққа аманат етіп жеткізеді.
