ЖОЛ МӘСЕЛЕСІ ШЕШІМІН ТАПТЫ
Қоғамдық қабылдаулар – жергілікті билік пен халық арасындағы байланысты нығайтудың тиімді тетігі. Әсіресе тұрғындардың күнделікті өміріне тікелей әсер ететін инфрақұрылым мәселелерін шешуде мұндай кездесулердің маңызы зор. Қаратау ауданында өткен кезекті қабылдау соның жарқын дәлелі болды.
Тарқатсақ, «AMANAT» партиясының Қаратау аудандық филиалы ғимаратында өткен қоғамдық қабылдауға аудан әкімі Алмас Емелтайұлы қатысып, тұрғындардың өтініш-тілектерін тыңдады. Сол жиында Сайрам тұрғын алабының Б.Садықов көшесі тұрғындары басты мәселе ретінде жолдың жағдайын көтерді. Көп жылдан бері жөндеу көрмеген көше тұрғындарға үлкен қиындық тудырып келген еді. Жаңбырлы күндері батпаққа батқан жол балалардың мектепке баруын, тұрғындардың жұмысқа қатынауын ауырлатса, құрғақ күндері шаңнан көз аштырмаған. Қабылдауда сөз алған тұрғындар өз көшелеріне асфальт төселсе деген өтінішін жеткізді. Аудан әкімі мәселені назарға алып, оң шешуге бар күшін салатынын айтты. Бұл уәде қысқа уақыт ішінде жүзеге асырылып, нәтижесінде Сайрам тұрғын алабының Б.Садықов көшесінде асфальттау жұмыстары жүргізілді. Тұрғындардың көптен күткен мәселесі шешімін тауып, елдің ризашылығына бөленді. Бұл жағдайдан бірнеше қорытынды жасауға болады. Біріншіден, қоғамдық қабылдаулардың шынайы тиімділігі дәлелденді. Халықтың уәжі тікелей билік өкілдеріне жетіп, бірден қолға алынуы – ашық диалогтың нақты нәтижесі. Екіншіден, мұндай кездесулер тұрғындардың билікке деген сенімін арттырады. Көп жағдайда халық көтерген мәселелер қағаз жүзінде қалып қоятын деген көзқарас бар. Ал Сайрамдағы бұл мысал биліктің уәдені нақты орындайтынын көрсетті. Сонымен қатар, жол инфрақұрылымының жақсаруы тек тұрмыстық ыңғайлылық қана емес, экономикалық және әлеуметтік тұрғыдан да маңызы зор. Асфальт төселген көше тұрғындардың қозғалысын жеңілдетіп, шағын кәсіпкерліктің дамуына да ықпал етеді. Таза, қолайлы орта балалардың денсаулығына оң әсер етіп, қоғамдағы әлеуметтік әділеттіліктің орнауына сеп болады. Өйткені жақсы жол – өмір сапасының басты көрсеткіштерінің бірі.
AMANAT партиясының бастамасымен ұйымдастырылған қабылдау алаңы да бұл процесте шешуші рөл атқарды. Партия халық пен билік арасындағы көпір қызметін атқарып, жергілікті атқарушы орган мен қарапайым тұрғындардың арасындағы байланысты күшейтіп отыр. Бұл – партияның әлеуметтік жауапкершілікті өз міндетіне айналдырғанын айқын дәлелдейді. Әкімнің тұрғындар алдында берген уәдесін орындап, мәселені шешуі – жауапкершілік пен есеп берушіліктің үлгісі. Мұндай тәжірибені барлық деңгейдегі билік өкілдері жүйелі түрде қолға алса, қоғамдағы сенім деңгейі артып, азаматтардың белсенділігі күшейері анық. Қорытындылай келгенде, Сайрам тұрғын алабындағы Б.Садықов көшесінің асфальтталуы – жай ғана жол жөндеу емес, жергілікті билік пен қоғам арасындағы тиімді диалогтың жемісі. Тұрғындардың өтінішін тыңдап, оны орындау – мемлекеттің ең басты міндеттерінің бірі. Бұл оқиға қоғамдық қабылдаулардың сөз жүзіндегі емес, іс жүзіндегі нәтижесін көрсетіп отыр. Енді осы тәжірибені кеңінен таратып, халықтың әрбір уәжіне уақытылы жауап беру – әлеуметтік тұрақтылықтың басты кепілі болмақ.
