МҮМКІНДІГІ ШЕКТЕУЛІ ЖАНДАРДЫҢ МӘСЕЛЕСІ ҚАРАЛДЫ
Шымкент қаласында «AMANAT» партиясының «Құқықтық көмек» жобасы аясында өткен қоғамдық қабылдау азаматтардың денсаулық сақтау саласындағы өзекті мәселелерін шешуге бағытталды. Қалалық филиалдың Қоғамдық қабылдау бөлмесінде өткен кездесуде Денсаулық сақтау басқармасы басшысының міндетін уақытша атқарушы Сәуле Дүйсенбаева тұрғындарды жеке өтініштері бойынша қабылдап, олардың сұрақтарына жан-жақты түсініктеме берді.
Бұл қабылдау қоғамдағы әлеуметтік әділдік пен азаматтардың құқықтарын қорғауға бағытталған партияның жүйелі жұмысының бір бөлігі болып табылады. Азаматтар тарапынан ең көп көтерілген тақырыптардың бірі – мүгедектік рәсімдеудегі қиындықтар мен медициналық қызмет көрсету сапасы болды. Көптеген тұрғындар медициналық тексеруден өту, қажетті ем қабылдау және жеңілдікпен көмек алу мәселелерін қозғады. Сәуле Дүйсенбаева әрбір келушіні жеке қабылдап, олардың шағымдары мен өтініштерін мұқият тыңдады. Әрбір жағдай нақты қарастырылып, заң шеңберінде түсіндіру жұмыстары жүргізілді. Кейбір өтініштер бойынша жауапты медициналық мекемелерге тиісті нұсқаулар беріліп, тұрғындарға қажетті көмек көрсетілді. Денсаулық сақтау саласы – халықтың өмір сапасына тікелей әсер ететін маңызды бағыттардың бірі. Сондықтан мұндай қоғамдық қабылдаулардың өткізілуі азаматтардың билікке деген сенімін арттырып, әлеуметтік әділдік қағидатын нығайтуға ықпал етеді. Әсіресе, медициналық қызметтерге қол жеткізуде қиындық көріп жүрген әлеуметтік осал топтар үшін мұндай кездесулер ерекше маңызға ие.
«AMANAT» партиясының бастамасы арқылы тұрғындар өз мәселелерін тікелей сала мамандарына жеткізу мүмкіндігіне ие болып отыр. Бұл партияның халықпен ашық байланыс орнатудағы тиімді тәсілі екенін көрсетеді. Партия тек проблеманы тыңдап қана қоймай, оны шешу жолдарын нақты анықтап, тиісті органдармен бірге жұмыс жүргізуге күш салуда. Қоғамдық қабылдаулардың басты ерекшелігі – әрбір өтініштің назардан тыс қалмауы және оның орындалу барысының бақылауда болуы. Азаматтардың мәселелерін шешуде жауапкершілік танытқан партия өкілдері мен басқарма қызметкерлері бұл бағыттағы жұмысты жүйелі түрде жалғастыруға ниетті. «AMANAT» партиясының «Құқықтық көмек» жобасы бүгінде әлеуметтік тұрақтылық пен әділдікті қамтамасыз етудің маңызды тетігіне айналып отыр. Шымкент қаласында өткен қабылдау да осының айқын дәлелі. Тұрғындардың нақты проблемалары тыңдалып, шешу жолдары ұсынылды. Бұл – партияның қоғам алдындағы жауапкершілігін және халық мүддесін қорғауға бағытталған ұстанымының айғағы. Алдағы уақытта да мұндай қоғамдық қабылдаулардың тұрақты өткізілуі тұрғындардың әлеуметтік және денсаулық сақтау саласындағы түйткілдерін шешуге айтарлықтай әсер етері сөзсіз. Партия өкілдерінің айтуынша, басты мақсат – әрбір азаматтың мәселесін дер кезінде шешіп, халықтың өмір сапасын жақсартуға нақты үлес қосу.
