ЖАСТАРМЕН МАҢЫЗДЫ КЕЗДЕСУ ӨТТІ
Қазіргі қоғамда жастардың тәрбиесі мен азаматтық жауапкершілігі – елдің болашағын айқындайтын маңызды факторлардың бірі. Сол себепті өскелең ұрпақтың құқықтық сауаттылығын арттыру, заңға құрметпен қарауға тәрбиелеу мәселесі әрдайым өзекті. Осы бағытта «AMANAT» партиясы жүзеге асырып отырған «Бақытты отбасы» жобасы үлкен маңызға ие. Аталған бастама тек отбасылық құндылықтарды дәріптеумен шектелмей, жастар арасындағы тәртіп, мәдениет және құқықтық жауапкершілік деңгейін арттыруды мақсат етеді.
Жуырда осы жоба аясында Шымкент аграрлық-техникалық колледжінде студенттермен кездесу өтті. Іс-шараның негізгі мақсаты – жастар арасындағы құқықбұзушылықтың алдын алу, олардың заң алдындағы жауапкершілігін күшейту және құқықтық мәдениетін дамыту. Кездесуге Шымкент қалалық Полиция департаментінің жедел уәкілі, аға лейтенант Мұратбек Тәжібай қатысып, студенттерге заң нормалары, қоғамдағы тәртіп сақтау талаптары мен азаматтық борыш туралы жан-жақты түсіндірме берді. Кездесу барысында жасөспірімдер мен жастардың құқық бұзушылыққа баруына әсер ететін негізгі себептер сөз болды. Мұратбек Серікұлы жастардың қателікке бой алдырмауы үшін ең алдымен өз құқықтары мен міндеттерін білуі қажет екенін атап өтті. Ол сондай-ақ замандастардың әлеуметтік желілерде заңсыз әрекеттерге, агрессивті мінез-құлыққа немесе кибербуллингке жол бермеуі керектігін ескертті. Осындай түсіндіру жұмыстары жастардың құқықтық санасын оятып, олардың өз әрекеттеріне сын көзбен қарауға ықпал етеді. Колледж студенттері полицей маманға өздерін толғандырған сұрақтарын қойып, нақты мысалдар арқылы пікір алмасты. Тәжірибелі маман жастарға күнделікті өмірде туындайтын даулы жағдайларды заң аясында шешудің жолдарын түсіндіріп, қиындықтарға сабырмен және парасатпен қарауға шақырды. Бұл әңгіме студенттердің қызығушылығын тудырып, олар өз тараптарынан да ұсыныстар білдірді.
«AMANAT» партиясының өкілдері мұндай шаралардың маңызына ерекше тоқталды. Себебі жастар арасындағы құқықбұзушылықтың алдын алу – тек құқық қорғау органдарының емес, бүкіл қоғамның ортақ міндеті. Партия қолға алған «Бақытты отбасы» жобасы отбасылық тәрбиенің рөлін күшейтумен қатар, жас ұрпақтың рухани және моральдық дамуына бағытталған. Бұл бағдарлама аясында ата-аналармен, ұстаздармен және жастармен түрлі кездесулер, семинарлар мен тренингтер өткізіліп келеді. Осындай іс-шаралар арқылы жастар өз бойындағы жауапкершілік сезімін арттырып, қоғамдағы тәртіп пен заңдылықты сақтау қажеттігін жақсырақ түсінеді. Сонымен қатар, бұл кездесулер жастарды өз ортасында көшбасшы болуға, айналасына үлгі көрсетіп, құқықтық мәдениетті қалыптастыруға ынталандырады. Тәртіпті, саналы және білімді жас – ел болашағының кепілі. Кездесудің тағы бір маңызды нәтижесі – студенттердің құқық қорғау органдарының қызметіне деген сенімінің артуы. Тікелей диалог арқылы олар полиция жұмысының тек қылмыспен күрес емес, сонымен бірге алдын алу шараларын жүргізу, азаматтардың қауіпсіздігін қамтамасыз етуге бағытталғанын ұғынды. Бұл – құқық қорғау мәдениетін нығайтудың тиімді жолы.
