АУҒАНСТАНДЫҚ ИНВЕСТОРЛАР «ШАҒЫН ӨНЕРКӘСІПТІК ПАРК» ЖОБАСЫМЕН ТАНЫСТЫ
Түркістан облысы – Орталық Азиядағы экономикалық және мәдени даму орталықтарының бірі ретінде соңғы жылдары қарқынды дамып келеді. Ел Президенті Қасым-Жомарт Тоқаевтың «Инвестиция – дамудың басты тетігі» деген стратегиялық ұстанымын басшылыққа алған аймақ бүгінде халықаралық әріптестік бағытында нақты қадамдар жасап отыр. Облыс басшылығының бастамасымен өңір экономикасына шетелдік капитал тарту, жаңа жұмыс орындарын ашу және өндірістік әлеуетті арттыру бағытындағы істер жүйелі жалғасуда.
Сол бастамалардың бірі ретінде Түркістан облысы әкімінің орынбасары Талғат Қозбеков Ауғанстан елінен келген инвесторлар делегациясымен кездесті. Кездесудің мақсаты – Түркістанның инвестициялық мүмкіндіктерін таныстыру, шетелдік бизнес өкілдерімен ынтымақтастықты нығайту және жаңа жобаларды іске асыру жөнінде келіссөздер жүргізу болды. Ауғанстандық инвесторлар сапар барысында алдымен Түркістанның мәдени және рухани келбетімен танысты. Делегация мүшелері Қожа Ахмет Ясауи кесенесіне барып, оның тарихы мен аймақтың туризм әлеуетіне қызығушылық танытты. Бұл нысан тек рухани мұра ғана емес, өңірге шетелдік туристер мен инвесторларды тартудың маңызды факторы болып отыр. Бұдан кейін қонақтар «Ұлы Дала Елі» орталығы, Ясауи музейі және «Керуен сарай» туристік кешенінде болып, аймақтың инфрақұрылымдық даму деңгейімен танысты. Бұл нысандар Түркістанның жаңа келбетін айқындайтын мәдени-инновациялық жобалар қатарында. Олардың заманауи құрылымы мен қызмет көрсету сапасы шетелдік қонақтар тарапынан жоғары бағаланды. Ауғанстандық кәсіпкерлер мұндай ірі жобалардың іске асуы өңірдің инвестициялық тартымдылығын арттырып, халықаралық деңгейде беделін күшейтетініне тоқталды. Сапардың екінші бөлігі өндірістік бағытқа арналды. Делегация Сауран ауданындағы «Шағын өнеркәсіптік паркке» барды. Бұл аймақ соңғы жылдары өңірдің өндірістік орталығына айналып келеді. Мұнда әртүрлі бағыттағы кәсіпорындар шоғырланған, олардың қызметі өңірдің экономикалық өсіміне елеулі үлес қосып отыр.
Инвесторлар алдымен халықаралық стандарттарға сай «UBS» тоңазытқыштар шығаратын зауыттың жұмысымен танысты. Бұл кәсіпорын қазіргі таңда ішкі нарықты сапалы тұрмыстық техникамен қамтып қана қоймай, экспорт әлеуетін де арттырып отыр. Зауыт өкілдері өндіріс процесін автоматтандыру, экологиялық стандарттарды сақтау және жаңа технологияларды енгізу бағытындағы жұмыстар туралы мәлімет берді. Одан кейін қонақтар жиһаз өндіретін «Aqniet Holding» кешеніне барды. Мұнда өндіріс желілері толық цифрлық басқаруға негізделген. Компания өнімдері Қазақстанның әр өңіріне жеткізіліп, көрші елдердің нарығына экспортталады. Делегация мүшелері кәсіпорынның ұйымдастыру құрылымы мен логистикалық мүмкіндіктеріне жоғары баға берді. Кездесу барысында облыс әкімінің орынбасары Талғат Қозбеков Түркістан облысының экономикалық және өндірістік әлеуетіне тоқталды. Ол аймақтың ауыл шаруашылығы, туризм, жеңіл және қайта өңдеу өнеркәсібі салаларындағы даму мүмкіндіктерін кеңінен баяндап, шетелдік инвесторлар үшін қолайлы жағдайлар жасалып жатқанын атап өтті. Талғат Қозбеков өз сөзінде «Түркістан облысы бүгінде Қазақстанның инвестициялық орталықтарының біріне айналып келеді. Біз шетелдік кәсіпкерлер үшін барлық инфрақұрылымдық және әкімшілік жағдайды жасауға мүдделіміз. Инвестициялық жобаларды қолдау тетіктері бар, соның арқасында өңірімізде жүздеген жаңа жұмыс орындары құрылып, экономикалық белсенділік артып отыр» деді.
Шетелдік делегация өкілдері Түркістан облысының даму қарқыны мен кәсіпкерлік қолдау жүйесін жоғары бағалады. Олар өңірдің стратегиялық географиялық орналасуы, табиғи ресурстары мен еңбек әлеуеті жаңа инвестициялық жобаларды жүзеге асыруға мол мүмкіндік беретінін айтты. Ауғанстандық кәсіпкерлер өңірдің агроөнеркәсіп, жеңіл өнеркәсіп және құрылыс материалдары өндірісі салаларында бірлескен жобалар жасауға қызығушылық танытты. Бұл бағытта нақты ұсыныстар да ортаға салынды. Келешекте тараптар ауыл шаруашылығы өнімдерін өңдеу, тамақ өнеркәсібі және логистикалық қызметтерді дамыту саласында серіктестік орнату мүмкіндігін талқылады. Кездесу соңында екі тарап сауда және инвестиция салаларындағы ынтымақтастықты кеңейтуге ниетті екенін нақтылап, өзара әріптестікті дамыту бойынша алдын ала келісімдер жасады. Инвесторлар Түркістан облысында жүзеге асырылып жатқан инфрақұрылымдық және өндірістік жобалардың ашықтығына, мемлекеттік қолдау тетіктерінің тиімділігіне ерекше қызығушылық танытты.
