АШЫҚ ЕСІК КҮНІ ҰЙЫМДАСТЫРЫЛДЫ
2025–2026 оқу жылына арналған “Адал азамат” біртұтас тәрбие бағдарламасы аясында №97 жалпы орта білім беретін мектебінде оқушылардың патриоттық рухын көтеру, азаматтық жауапкершілігін қалыптастыру және болашақ мамандығын саналы түрде таңдауға бағыт беру мақсатында мазмұнды «Ашық есік күні» ұйымдастырылды. Бағдарламаның негізгі бағыттарының бірі – жас ұрпақты елге қызмет етуге тәрбиелеу, қауіпсіздік пен жауапкершілік мәдениетін қалыптастыру. Осы мақсатта мектептің қосымша педагог-ұйымдастырушысы Тоқтағұл Жұлдыз Ерболқызының жетекшілігімен 9-сынып оқушылары Шымкент қаласындағы №7 өрт сөндіру бөліміне арнайы таныстыру экскурсиясына барды.
Экскурсия кезінде оқушылар өрт сөндіруші мамандығының қоғам үшін қаншалықты маңызды екенін көзбен көріп, құтқарушылардың күнделікті қызметімен жақыннан танысты. Өрт сөндіру бөлімінің мамандары оқушыларға төтенше жағдайларға жедел әрекет ету тәртібін, өрт кезінде адам өмірін құтқарудың негізгі қағидаларын және қауіпті аймақтарда жұмыс істеудің жауапкершілігін түсіндірді. Балаларға арнайы техника, автосаты, су айдайтын құралдар, тыныс алу аппараттары және басқа да кәсіби жабдықтардың қалай қолданылатыны көрсетілді. Жасөспірімдер өрт сөндірушілердің дайындық деңгейі, оқу-жаттығулардың қалай өтетіні және апатты жою кезінде қандай шешімдер қабылданатыны туралы құнды ақпарат алды. Мамандар балаларға төтенше жағдай кезінде өзін-өзі ұстау, қауіпсіздік ережелерін сақтау және дұрыс хабар беру алгоритмдері жөнінде тәжірибелік кеңес берді. Бұл түсіндірмелер “Адал азамат” бағдарламасындағы қауіпсіздік мәдениеті мен жауапкершілікті қалыптастыру бағыттарына толық сәйкес келеді. Экскурсия оқушылардың бойында елін қорғауға, қоғамдық қауіпсіздікке үлес қосатын мамандықтарға деген құрмет пен қызығушылықты арттырды. Өрт сөндіруші мамандығының қиын да жауапты екеніне көз жеткізген жасөспірімдер үшін бұл шара үлкен тәрбиелік мәнге ие болды. Балалар өздерінің болашақ кәсіби жолын таңдауда жауапкершілікпен қарау керектігін түсініп, қоғамға пайда тигізетін мамандықтардың маңызын сезінді.
Іс-шара оқушылардың патриоттық сезімін күшейтіп, оларды азаматтық борышын терең түсінуге жетеледі. №97 мектепте ұйымдастырылған «Ашық есік күні» жас ұрпақтың болашаққа деген көзқарасын қалыптастырып, “Адал азамат” бағдарламасының негізгі мақсаттарының өмірде іске асуына ықпал еткен маңызды тәрбиелік қадам болды.
