МАҢЫЗДЫ НЫСАНДАҒЫ ҚҰРЫЛЫС ҚАРҚЫНДЫ ЖҮРІП ЖАТЫР
Түркістан облысының ең қиыр шетінде орналасқан, диқандар мекені атанған Мақтаарал ауданында инфрақұрылымды жаңғырту бағытындағы ауқымды жұмыстар қарқын алды. Бүгінде мұндағы А-15 республикалық маңызы бар автомобиль жолының 2-шақырымында орналасқан көпірге күрделі жөндеу жұмыстары қызу жүргізіліп жатыр. Аталған стратегиялық нысан жай ғана өткел емес, аудан аумағындағы ең ірі елді мекендердің бірін сыртқы әлеммен байланыстырып отырған, өңір тұрғындары үшін тіршілік нәрі мен көлік қатынасының басты күретамыры саналатын өміршең инфрақұрылымдық жоба болып табылады. Тәулік бойы толастамайтын көлік ағыны бұл көпірдің аймақ экономикасы мен әлеуметтік жағдайы үшін қаншалықты маңызды екенін айқындап берсе керек.
Ауқымды инфрақұрылымдық жобаның жалпы ұзындығы 168,6 метрді құрайды. Оның ішінде негізгі темірбетонды көпірдің өз ұзындығы — 25,4 метр болса, ал жол төсемінің ені — 9 метрді құрап, заманауи талаптарға сай кеңейтілмек. Өңірдің көлік әлеуетін арттыратын бұл жобаның жалпы құны — 358 миллион теңге. Бұл қомақты қаражат нысанның сапалы әрі ұзақ жылдар бойы халыққа мүлтіксіз қызмет етуі үшін бағытталып отыр. Көпір құрылысындағы жұмыстардың барысымен және орындалу сапасымен тікелей танысу мақсатында «ҚазАвтоЖол» ұлттық компаниясы акционерлік қоғамының Түркістан облыстық филиалының директоры Ербол Пірімбетов Мақтаарал ауданына арнайы жұмыс сапарымен келіп, құрылыс алаңын аралады. Жұмыс сапары аясында филиал басшысы бас мердігер мекеме — «TM-Bussine group» жауапкершілігі шектеулі серіктестігінің басшылығымен және инженерлік құрамымен бетпе-бет кездесті. Жүздесу барысында Ербол Пірімбетов құрылыс жұмыстарының сапасы мен оның бекітілген мерзімде, еш кешіктірілмей аяқталуына ерекше назар аудару қажеттігін шегелеп айтты. Қазіргі таңда бұл нысанда бірқатар күрделі де маңызды жұмыстар толығымен орындалып үлгерді. Атап айтқанда, құрылыс жүріп жатқан уақытта жергілікті халықтың тіршілігі тоқтап қалмауы, жеңіл автокөліктердің күнделікті қозғалысын үзбеу мақсатында арнайы уақытша айналма жол өткелі салынып, іске қосылды. Сонымен қатар жол қауіпсіздігін жоғары деңгейде қамтамасыз ету үшін қажетті ескерту және бағыттаушы жол белгілері толық орнатылды. Көпірдің астынан өтетін барлық инженерлік-коммуналдық желілердің орындары қауіпсіз жерге ауыстырылып, тозығы жеткен ескі көпір құрылымдарын демонтаждау жұмыстары да сәтті аяқталды.
Бүгінгі таңда құрылыс алаңында мазасыз тіршілік орнаған. Жобалық-сметалық құжаттаманың қатаң талаптарына сәйкес, көпірдің ең басты тірегі саналатын қадалы іргетасын дайындау жұмыстары үлкен жауапкершілікпен жалғасуда. Құрылысшылар тарапынан берік арматуралық қаңқаларды тоқу, қажетті тереңдікте ұңғымаларды бұрғылау және жоғары маркалы бетон құю процестері мұқият атқарылып жатыр. Мұның бәрі болашақ көпірдің селге де, зілзалаға да, ауыр жүк көліктерінің салмағына да төтеп бере алатын беріктігі мен ұзақ мерзімді пайдаланылуын қамтамасыз етуге бағытталған алғышарттар. Нысанда бекітілген өндірістік кесте бойынша қажетті білікті жұмысшы күші мен арнайы ауыр техникалар жеткілікті көлемде жұмылдырылған, жұмыс қарқынында ешқандай іркіліс байқалмайды. Құрылыс жұмыстарының сапасы мен халықаралық стандарттарға сәйкестігі тапсырыс беруші мекеме, техникалық қадағалау мекемесі және ұлттық сапа орталығы тарапынан тұрақты әрі өте қатаң бақылауға алынған.
Жауапты мамандардың берген ресми мәліметіне сүйенсек, көпірді күрделі жөндеу жұмыстары өндірістік жоспарға сай, биылғы жылдың соңына дейін толық аяқталып, халықтың игілігіне пайдалануға беріледі деп көзделіп отыр. Айта кетелік, аталған жоба өңірдегі көлік қатынасының қауіпсіздігін айтарлықтай арттырып, мақтааралдық тұрғындардың аудан орталығы мен көршілес аймақтарға еш кедергісіз қатынау мүмкіндігін жақсартады. Ең бастысы, бұл жаңа өткел республикалық маңызы бар жол бойындағы халықаралық және отандық көлік қозғалысының үздіксіз, қауіп-қатерсіз қамтамасыз етілуіне өзіндік оң әсерін тигізіп, Түркістан облысының логистикалық абыройын асыра түспек.
