БЕКЗАТ СЕКТОРЫНДА ЖАҢА МЕДИЦИНАЛЫҚ ОРТАЛЫҚ ЖАҚЫНДА ПАЙДАЛАНУҒА БЕРІЛЕДІ
Түркістан топырағындағы жасампаздық пен оң өзгерістер серпіні бүгінде өңірдің әлеуметтік-экономикалық келбетін сапалық жаңа деңгейге көтеріп келеді. Түркі әлемінің рухани астанасы мәртебесіне ие болған шаһарда инфрақұрылымдық жобалармен қатар, халықтың тұрмыс сапасын тікелей жақсартуға бағытталған игі бастамалар қарқынды жүзеге асырылуда. Соның ішінде денсаулық сақтау саласын жаңғырту, заманауи медициналық инфрақұрылымды қалыптастыру және халыққа көрсетілетін медициналық көмектің қолжетімділігін қамтамасыз ету — мемлекеттік саясаттың негізгі басымдықтарының бірі болып қала береді. Әсіресе, шеткі шағынаудандар мен секторларды дамыту, олардағы тұрғындарға сапалы әлеуметтік қызметтерді жақындату ісі соңғы жылдары жүйелі сипат алды. Осы орайда, Түркістан қаласындағы Бекзат секторында бой көтерген жаңа медициналық орталықтың пайдалануға берілуге дайындығы — өңірдің денсаулық сақтау саласындағы ірі қадамдардың бірі.
Мемлекет басшысы Қасым-Жомарт Тоқаев өзінің Жолдауларында елдің медициналық инфрақұрылымын нығайту, әсіресе алғашқы санитариялық-медициналық көмек көрсету жүйесін жетілдіру қажеттілігін үнемі баса айтып келеді. Президент жүктеген тапсырмалар аясында жекеменшік сектор мен мемлекет арасындағы әріптестікті дамыту, инвестиция тарту арқылы әлеуметтік нысандарды салу ісі бұрын-соңды болмаған қарқын алды. Түркістан қаласында бой көтерген жаңа екі қабатты медициналық орталық – дәл осы мемлекеттік бағдарламалардың жемісті нәтижесі әрі жеке капиталды әлеуметтік жауапкершілікке бағыттаудың жарқын үлгісі. Нысан мемлекеттік бағдарламалар аясында арендалық жер телімін бөлу арқылы жүзеге асырылып, халық игілігіне берілуге тақап отыр. Жақында Түркістан қаласының әкімі Әзімбек Пазылбекұлы мен Түркістан облысы денсаулық сақтау басқармасының басшысы Асхан Байдуәлиев аталған медициналық нысанның ашылу дайындығымен арнайы танысып, атқарылған жұмыс көлемін сарапқа салды. Қазіргі таңда ғимаратта ішкі әрлеу жұмыстары аяқталу кезеңіне жеткен. Сонымен қатар заманауи талаптарға сай жоғары технологиялық медициналық құрал-жабдықтарды орнату, нысанның инженерлік-инфрақұрылымдық жүйелерін толық жасақтау және ең бастысы – білікті де тәжірибелі медицина мамандарын қабылдау жұмыстары қызу жүріп жатыр. Буыны бекіп, іргесі бекіген жаңа орталық сәулеттік тұрғыдан да, ішкі мазмұны жағынан да заманауи стандарттарға толық жауап береді.
Бұл нысанның ең басты стратегиялық мәні мен басымдығы – оның міндетті әлеуметтік медициналық сақтандыру (МӘМС) жүйесі аясында қызмет көрсететіндігінде. Заманауи медицинада халыққа көрсетілетін қызметтің қаржылық тұрғыдан қолжетімді болуы – басты факторлардың бірі. Жаңа емдеу мекемесі іске қосылғаннан кейін Бекзат секторының және іргелес аймақтардың тұрғындары осы емханаға тіркеліп, бейінді дәрігерлердің қабылдауынан тегін өте алады. Бұған қоса, орталықта кең ауқымды зертханалық және диагностикалық тексерулер жүргізіліп, күндізгі стационар қызметі толық көлемде ұсынылады. Бұл дегеніміз – тұрғындардың сапалы медициналық көмек алу үшін қала орталығына бармай-ақ, өзі тұратын шағынауданда барлық қажетті тексерулерден өтіп, емделуіне толық мүмкіндік туады деген сөз. Осылайша, емханалардағы кезектен арылу, медициналық көмек алу ұзақтығын қысқарту және аурудың алдын алу, яғни скринингтік зерттеулерді ерте бастан жүргізу ісі жаңа белеске көтеріледі. Жеке инвестор есебінен салынған бұл нысан өңірдегі мемлекеттік-жекеменшік әріптестіктің тиімді моделін көрсетіп отыр. Мемлекет тарапынан жер телімі бөлініп, тиісті инфрақұрылымдық қолдау көрсетілсе, жеке инвестор заманауи ғимарат тұрғызып, оны озық құрал-жабдықтармен жабдықтауды өз мойнына алды. Мұндай қадам бюджет жүктемесін жеңілдетіп қана қоймай, әлеуметтік саладағы бәсекелестікті арттырады, бұл түптеп келгенде көрсетілетін қызмет сапасының артуына тікелей ықпал етеді.
Нысанды аралау және дайындық барысын тексеру барысында қала әкімі Әзімбек Пазылбекұлы медициналық қызмет сапасын арттыру – тұрғындардың өмір сүру сапасын жақсартудың негізгі де маңызды бағыттарының бірі екеніне ерекше тоқталды. Қала басшысы орталықты іске қосу кезінде барлық құрылыс, санитарлық-эпидемиологиялық және медициналық стандарттардың толық, әрі бұлжытпай сақталуын, қызмет көрсету процесінің жоғары деңгейде ұйымдастырылуын жауапты тұлғаларға қатаң тапсырды.
