ЖОЛ САПАСЫ ЖАҚСАРА ТҮСУДЕ
Шымкентте жақсы және қанағаттанарлық жолдардың үлесін арттыру мақсатында қыруар іс тынды. Бүгінде қалаға қарасты көптеген шағынауданның ішкі орамдық көшелері жөнделіп, пайдалануға берілді. Аталған бағыттағы жұмыстар алдағы уақытта да жалғасын табары сөзсіз. Ал бүгінгі материалымызда жүзеге асқан жұмыстар жайын тарқата жазуды жөн санап отырмыз.
Қалаға қарасты Қаратау ауданы аумағында жоспарланған 48 көшенің бүгінде 17-інде орташа жөндеу жұмыстары аяқталды. Атап айтқанда, Қызылсу тұрғын алабы аумағындағы Гүлистанның 8 көшесінде орташа жөндеу жұмыстары аяқталды. Аталмыш көшелердің жалпы ұзындығы 6,7 шақырымды құрайды. Сонымен қатар, орташа жөндеуден өткен Жаңақұрылыс № 2,3 көшелерінің ұзындығы — 1,3 шақырым. Сонымен бірге, Сайрам тұрғын алабындағы Сыдыхан ата, Мүслім төбе, Тектұрмас, Тиллаходжаев көшелерінде асфальтбетон қабатын төсеу жұмыстары аяқталды. Асар-2 шағын ауданындағы №1,2 көшелері орташа жөндеуден өтіп, бүгінде ел игілігіне пайдалануға берілді. Өтеміс шағын ауданы аумағындағы Д.Қонаев және Өжен көшесінде орташа жөндеу жұмыстары аяқталды. Достық тұрғын алабындағы Ынтымақ көшесі, Омарташы көшесінің жалғасы, тұйығы және Абдиров көшелерінің жолдары жөнделді. Ұзындығы 1,4 шақырымды құрайтын Ақжайық шағын ауданының аумағындағы Қамбар батыр көшесінің орташа жөндеу жұмыстары аяқталды. Қайнарбұлақ тұрғын алабының Русские березки көшесінің жол құрылыс жұмыстары аяқталды, ұзындығы 2 шақырымды құрайды. Қалалық жолаушылар көлігі және автомобиль жолдары басқармасының мәліметінше, 2022 жылы жоспарланған 308 көшенің бүгінгі таңда 155 шақырым болатын 190 көшесінде жұмыстар толығымен аяқталды. Ал, қалған көшелерді 2022 жылдың аяғына дейін аяқтау жоспарланған. Жалпы биыл Шымкент қаласында жақсы және қанағаттанарлық жолдардың үлесін арттыру бағытында ауқымды бастамалар көтеріліп, жүзеге асырылып келе жатыр. Былтыр қала орталығындағы көшелерді жөндеуге айрықша басымдық берілсе, биыл қалаға қарасты шағынаудандар мен елді мекендердің ішкі орамдық көшелерін жөндеу ісіне айрықша назар аударылып отыр. Ал атқарылып жатқан жұмыстар жайы қала әкімі Мұрат Әйтеновтің тікелей бақылауында екенін де айта кету керек.
