2,6 МЫҢНАН АСТАМ МҮГЕДЕКТІГІ БАР АЗАМАТ ЖҰМЫСПЕН ҚАМТУ ШАРАЛАРЫНА ҚАТЫСҚАН
Мемлекет басшысы Қасым-Жомарт Тоқаев өзінің Жолдауларында инклюзивті қоғам құру, мүгедектігі бар азаматтарды әлеуметтік адаптациядан өткізу және оларды белсенді еңбек нарығына интеграциялау заманауи реформалардың өзегі болуы тиіс екенін үнемі атап өтеді. Мемлекеттік қолдаудың түпкі мақсаты – тек патерналистік жәрдемақы берумен шектелу емес, азаматтардың ішкі әлеуетін ашып, оларды экономикалық үдерістердің толыққанды қатысушысы ету. Бұл орайда, түркі әлемінің рухани орталығы – Түркістан қаласында мүгедектігі бар азаматтарды нәтижелі жұмыспен қамту, олардың кәсіби біліктілігін арттыру және кәсіпкерлік бастамаларына жол ашу бағытында кешенді де жүйелі жұмыстар қарқынды жүргізіліп келеді.
Елімізде іске асырылып жатқан «Еңбек нарығын дамытудың 2024-2029 жылдарға арналған тұжырымдамасы» – әлеуметтік-еңбек саласындағы сапалы өзгерістерге жол ашқан басты құжаттың бірі. Осы тұжырымдама аясында 2026 жылы Түркістан қаласы бойынша жалпы 6 600 мүгедектігі бар адамды жұмыспен қамтудың ауқымды межесі жоспарланған болатын. Жыл ортасынан ауған уақыттағы, яғни 1 тамыздағы ресми жағдай бойынша шаһарда 2 679 азаматқа еңбекпен қамтудың түрлі белсенді шаралары көрсетіліп, бекітілген жылдық жоспардың 40,5 пайызы мерзімге сай орындалды. Бұл көрсеткіш – өңірдегі әлеуметтік қолдау механизмдерінің тек қағаз жүзінде қалмай, нақты іс жүзінде жедел нәтиже беріп жатқанының айқын дәлелі. Мемлекет тарапынан ұсынылып отырған кешенді қолдау әрбір азаматтың жеке мүмкіндігі мен кәсіби икемділігін ескере отырып, сараланған форматында жүзеге асырылуда. Көрсетілген қолдаудың ішіндегі ең маңызды да салмақты көрсеткіш – азаматтарды тұрақты жұмыс орындарына орналастыру динамикасы. Нақты деректерге сүйенсек, шаралармен қамтылған азаматтардың ішінде 1 092 адам тұрақты жұмысқа орналасып, тұрақты айлық табыспен қамтамасыз етілді. Сонымен бірге, 699 азамат уақытша жұмыспен қамтылып, өңірдің еңбек ресурстарының құрамына енді. Еңбек нарығының қазіргі динамикалық сұраныстарына бейімделу мақсатында цифрлық технологияларды пайдалану арқылы 239 адам арнайы онлайн оқыту курстарын сәтті аяқтап, сұранысқа ие заманауи білім мен дағдыларды меңгерді. Бұдан бөлек, экономикалық дербестікке ұмтылған 530 азамат «Бастау бизнес» жобасы бойынша кәсіпкерлік негіздерін үйренуге бағытталды. Осы білім беру және бағыттау жұмыстарының нәтижесінде, өздерінің жаңа бизнес идеяларын өмірде жүзеге асыру үшін 119 мүгедектігі бар азаматқа мемлекеттік қайтарымсыз гранттар беріліп, олардың жеке кәсібін бастауына берік негіз қаланды.
Уақытша жұмыспен қамту бағытында да сараланған әлеуметтік бағдарламалардың әлеуеті толық пайдаланылуда. Еңбекпен қамтылған азаматтардың ішінде 104 адам арнайы әлеуметтік жұмыс орындарына тартылса, 92 жас маман «Жастар практикасы» бағдарламасы арқылы алғашқы кәсіби тәжірибесін шыңдауға мүмкіндік алды. Сондай-ақ 435 азамат қоғамдық жұмыстарға тартылып, 68 аға буын өкілі «Күміс жас» жобасына өтіп, қоғамдағы белсенді еңбек стажын ары қарай жалғастырды. Сонымен қатар, мүгедектігі бар азаматтарды жұмысқа орналастырудың міндетті заңнамалық тетігі ретінде кәсіпорындар мен мекемелерде арнайы квота белгілеу жұмыстары жүйелі жүргізіліп келеді. Бүгінгі таңда қаладағы өндіріс пен мекемелерде 256 адамға арнайы квота белгіленіп, соның ішінде 153 азамат өз мамандануы бойынша нақты жұмыспен қамтылды. Түйіндей айтқанда, Түркістан қаласында мүгедектігі бар азаматтарды қолдау бағытында атқарылып жатқан ауқымды шаралар – тек әлеуметтік көрсеткіштерді орындау емес, адам капиталын дамытудың, әділеттілік пен теңдік принциптерін нығайтудың айқын көрiнiсi. Аталған бағыттағы кешенді әрі жүйелі жұмыстар алдағы уақытта да өз қарқынын бәсеңдетпей, Түркістан шаһарының әлеуметтік-экономикалық тұрақтылығы мен инклюзивті дамуына өзіндік қомақты үлесін қоса бермек.
