ТҮРКІСТАНДА ЖҰМЫС БЕРУШІЛЕРГЕ ЕҢБЕК ЗАҢНАМАСЫНЫҢ ТАЛАПТАРЫ ТҮСІНДІРІЛУДЕ
Экономиканың тұрақтылығы мен қоғамдағы әлеуметтік әділеттіліктің негізгі діңгегі – еңбек қатынастарының ашықтығы мен заңдылығы. Қай елде болсын, бейресми жұмыспен қамту немесе көлеңкелі экономика халықтың әлеуметтік қорғалу деңгейін төмендетіп, мемлекеттік бюджеттің әлеуетін азайтатыны жасырын емес. Осы орайда, еліміздің қарқынды дамып келе жатқан өңірлік орталығы – Түркістан қаласында жұмыс берушілердің еңбек заңнамасы талаптарын қатаң сақтауына және еңбек қатынастарын заңдастыруға бағытталған ауқымды да жүйелі түсіндіру жұмыстары жүргізіліп жатыр.
Түркістан қаласы әкімінің арнайы тапсырмасына сәйкес, шаһар аумағында қызмет атқаратын жұмыс берушілердің жұмысшыларды заң талаптарына сай ресми жұмыспен қамтуын, еңбек шарттарын дұрыс әрі уақтылы рәсімдеуін және бюджетке тиісті салықтар мен міндетті төлемдердің іркіліссіз аударылуын қамтамасыз ету мақсатында арнайы жұмыс тобы құрылды. Басшылық тарапынан құрылған бұл сараптамалық жұмыс тобының мүшелері қазіргі таңда қала аумағындағы түрлі саладағы жұмыс берушілермен тікелей кездесіп, еңбек қатынастарын қолданыстағы заңнама шеңберінде рәсімдеу мәселелері бойынша жан-жақты түсіндіру және ағарту жұмыстарын үздіксіз жүргізіп келеді. Өткізіліп жатқан кездесулер мен талдаулар барысында бірнеше басым бағытқа айрықша назар аударылуда. Атап айтқанда, әрбір қызметкермен еңбек шартын міндетті түрде жасасу және оны бекітілген заңды тәртіппен рәсімдеу, жұмысшылардың конституциялық еңбек құқықтарын сақтау, көлеңкелі әрі бейресми жұмыспен қамтуға мүлдем жол бермеу, сондай-ақ жалақыдан есептелетін салықтар мен міндетті төлемдерді бюджетке уақытылы аудару мәселелері басты орынға қойылған. Жұмыс тобының мамандары әрбір кәсіпкерлік субъектісіне еңбек шартының жай ғана қағаз емес, тараптардың заңды құқықтарын қорғайтын негізгі құжат екенін ашып түсіндіруде.
Түсіндіру жұмыстары барысында жұмыс берушілерге қызметкерлерді ресми түрде жұмыспен қамтудың зор маңызы мен оның жұмысшының әлеуметтік қорғалуына тигізетін тікелей оң әсері егжей-тегжейлі баяндалуда. Заң талаптарына сәйкес толыққанды рәсімделген еңбек қатынастары ең алдымен жұмысшының еңбек өтілін ресми қалыптастыруға, мемлекеттік әлеуметтік төлемдерге қол жеткізуге және жинақтаушы зейнетақы жүйесіне белсене қатысуына кең мүмкіндік береді. Яғни, бұл саясат азаматтардың бүгінгі еңбегін ғана емес, ертеңгі аға буын жасына жеткендегі әлеуметтік қауіпсіздігін де камтамасыз етуге бағытталған. Жұмыс тобының бұл бағыттағы сараптамалық әрі практикалық қызметі еңбек қатынастарын толығымен заңдастыруға, көлеңкелі жұмыспен қамтудың алдын алуға, азаматтардың заңды еңбек құқықтарын сенімді қорғауға және қала бюджеті кірістерінің тұрақты әрі үздіксіз қалыптасуын қамтамасыз етуге тікелей бағытталған. Түркістан қаласы Мансап орталығы тарапынан жұмыс берушілермен, кәсіпкерлермен және еңбек ұжымдарымен жүргізіліп жатқан бұл жүйелі түсіндіру жұмыстары алдағы уақытта да тұрақты түрде жалғасатын болады.
