КӘСІПКЕРЛІК САЛАНЫҢ ТҮЙТКІЛДЕРІ ТАЛҚЫЛАНДЫ
Елімізде әр азаматтың өтініші мен тілегіне айрықша назар аударылады. Оның ішінде кәсіпкерлік сала мен қаржы ұйымдарының арасындағы байланыс мәселесі қашан да өзекті. «Атамекен» кәсіпкерлік палатасының Шымкент қалалық филиалында өткен дөңгелек үстел жиынында дәл осы тақырып қозғалды.
Басқосуға Шымкент қалалық қоғамдық кеңесінің мүшелері Мырзахмет Сынабаев, Рүстем Әшетаев, Азат Әміртай және жергілікті кәсіпкерлер келді. Кездесуде ҚР Президентінің Жолдауы аясындағы кәсіпкерлікке қолдау және дамыту тетіктері сөз болды. «Қалалық қоғамдық кеңес үкімет пен халықтың арасындағы «алтын көпір» рөлін атқарып жатыр деуге болады. Мысалы, бір жағынан, азаматтардың өтініштерін билік өкілдеріне жеткізу болса, екінші жағынан, құқықтық-нормативтік актілерді, жаңашылдықтарды халық арасында түсіндіру де бар. Мемлекет басшысы Жолдауында экономика, оның ішінде кәсіпкерлікке баса назар аударды. Оның ішінде қоғамдық кеңестің отырыстарында құрылыс, кәсіпкерлік, ауыл шаруашылығы, қалалық сәулет, жер қатынастары, тұрғын үй, коммуналды шаруашылық тақырыптары жиі көтеріледі. Осы салаларға қатысты ой-пікірлеріңіз, талап-шағымдарыңыз болса, бірге талқылайық. Біз жауапты мамандарға жеткізуге тырысамыз» – деді Мырзахмет Сынабаев.
Жиынға қатысушы кәсіпкерлер өздерін толғандырған мәселелерді көтерді. Іскер азаматтарды, оның ішінде, әсіресе, жеңілдетілген несие алу мен басқа да қаржылық қолдау мәселелері мазалайды. Кейбір кәсіпкерлер жұмыс істеп тұрған өндірісі бола тұра екінші деңгейлі банктен несие алуда кедергіге тап болатындарын жеткізді. Қоғамдық кеңес мүшелері көтерілген мәселелер мен сұрақтарды жазып алып, тиісті органдарға жеткізуге уәде берді.
Соңғы уақытта елімізде кәсіпкерлік саланың қанат жаюы үшін барынша жағдай жасалып келеді. Себебі аталған сала халықты жұмыспен қамту мәселесінің шешілуіне тікелей мұрындық болып отыр. Сондықтан кәсіпкерлердің толғақты мәселесін шешу – саланың ғана емес қоғамның да түйткілінің ағытылуына сеп болады.
