ІРІ ӨНЕРКӘСІП НЫСАНДАРЫ АШЫЛАДЫ
Шымкентте кәсіпкерлік саланың дамуы үшін барлық жағдайлар жасалып келеді. Нақтырақ айтсақ, индустриалдық аймақтардың қатары қалыңдап келе жатыр. Сонымен қатар ашықтықты қамтамасыз ету мақсатында саланы цифрландыру ісі де қарқын алған. Осының арқасында үшінші мегаполис аумағында бірнеше ірі өнеркәсіп нысандары ашылмақ. Тарқатайық…
«KAZALPACK» компаниясы биыл құны 23,4 млрд теңгені құрайтын алюмин банкілерінің өндірісі жобасын іске қосып, 150 жаңа жұмыс орны құрылды. Қосымша 2023-2025 жылдары алюмин тақталары мен листтер өндірісі жобасы іске асырады. Инвестиция көлемі 40 млрд теңге, 350 жаңа жұмыс орны құрылады. «Karlskrona» компаниясы құны 26 млрд теңгені құрайтын гидравликалық насостар өндірісі жобасын жүзеге асырады. Онда 1 мыңнан астам жаңа жұмыс орнын ашу жоспарланған. Өзбекстандық инвестордың қатысуымен «Orient Ceramic» компаниясы құны 13 млрд теңгеге керамикалық тақталар өндірісі жобасын жүзеге асыруды жоспарлауда. 300-ден астам жаңа жұмыс орындары құрылады. 1 000 орындық көпфункционалды университеттік клиника мен заманауи емхана жобасын іске асыру жоспарланып отыр. Инвестиция көлемі 120 млрд теңге, 3 мыңға жуық жұмыс орны. Қазіргі таңда жобалау жұмыстары аяқталып, сараптамадан өтуде. «Asia Trafo» компаниясының құны 7 млрд теңгені құрайтын трансформатор өндірісі. Жоба аясында Орталық Азияда теңдесі жоқ жоғары кернеулі реакторлар шығарылады. Жалпы Шымкентте жалпы аумағы 743 га құрайтын 4 индустриялық аймақта 185,3 млрд теңгеге 130 жоба іске асырылып, 8 мыңға жуық жұмыс орны ашылды. Қала экономикасының қарқынды дамуына және инвесторлар тарапынан сұраныстың артуына байланысты жаңадан 4 өндірістік алаң ашу жұмыстары басталып та кеткен. Жұмыс нәтижесін беріп жатыр деп айтуға әбден болады. Бүгінде қалаға тартылар инвестиция көлемі артып, еліміздің өзге өңірлерімен салыстырғанда жоғары көрсеткішке ие болуда. Сөз жоқ, осыншама игі істің артында индустриалды аймақтардың мүмкіндігі жатқаны айтпаса да белгілі.
