6 КӘСІПОРЫНҒА МЕМЛЕКЕТТІК ҚОЛДАУ КӨРСЕТІЛДІ
Агроөнеркәсіптік кешенді дамыту азық-түлік қауіпсіздігін қамтамасыз етуге үлкен септігін тигізеді. Сондықтан мемлекет басшысы Қасым-Жомарт Тоқаев та соңғы Жолдауында аталған салаға айрықша назар аудару тапсырмасын жүктеген болатын. Бүгінде еліміздің өңірлерінде ауыл шаруашылығын дамыту бағытында бірқатар бастамалар көтерілуде. Ол қатарда үшінші мегаполис те бар.
Соңғы деректерге сүйенсек, Шымкент қаласы аумағында ауыл шаруашылығы өнімдерін қайта өңдеуші 45-тен астам кәсіпорын жұмыс істейді. Олардың негізгі бағыты – ұн, макарон, ірімшік, сары май, айран, шұжық, консерві өндіру. Сонымен қатар ауыл шаруашылығы өнімдерін қайта өңдеу үлесін арттыру мақсатында биылғы жылы 3 сүтті қайта өңдеуші кәсіпорындар іске қосылады. Қазір «Өңдеуші кәсіпорындардың ауылшаруашылық өнімін тереңдете өңдеп өнім өндіруі үшін оны сатып алу шығындарын субсидиялау» бағдарламасы арқылы сүтті қайта өңдеп қатты ірімшік пен сары май өндіруші 6 кәсіпорынға мемлекеттік қолдау көрсетіліп, жыл сайын өнімдердің қуаттылығы артты. Сондай-ақ Шымкент қаласының Қайнарбұлақ тұрғын алабы ауданында ауыл шаруашылығы өнімдерін терең өңдеу бойынша жалпы ауданы 132 гектар «Бозарық» тамақ өнеркәсібінің индустриялық аймағын құру бойынша жұмыстар жүргізілуде. Агроөнеркәсіптік кешенді дамытудың мемлекеттік бағдарламасы аясында құрылатын индустриялық аймақтың инженерлік-инфрақұрылымдық желілерін биыл аяқтау жоспарлануда. «Бозарық» өндірістік аймағы іске қосылған жағдайда құны 18 млрд теңгені құрайтын 27 инвестициялық жобалар жүзеге асатын болады. Осының арқасында үшінші мегаполистегі агроөнеркәсіптік кешеннің даму қарқыны жеделдей түспек. Бұл, өз кезегінде, қазынаға қыруар қаржы әкелумен қатар, жаңа жұмыс орындарының да көптен ашылуына сеп болмақ.
