КӨШПЕЛІ КЕЗДЕСУ ЕҢБЕКШІ АУДАНЫНДА ҚОРЫТЫНДЫЛАНДЫ
Шымкент қаласында тұрғындардың өмір сапасын жақсартуға бағытталған кешенді жұмыстар жалғасуда. Қала әкімі Ғабит Сыздықбеков есепті кездесулердің соңғы күнінде Тоғыс және Тұрдыабад тұрғын алаптарындағы Қаратөбе, Алатау көшелерінің, сондай-ақ «Жеңіс» саябағы маңындағы үйлердің тұрғындарымен жүздесті. Кездесу барысында халық көкейінде жүрген мәселелерді ортаға салып, ұсыныстарын жеткізді.
Жиында жол-көлік инфрақұрылымын дамыту, өзен жағалауы мен «Бадам» су қоймасын абаттандыру, шалғай көшелерді жарықтандыру сияқты маңызды мәселелер көтерілді. Бұдан бөлек тұрғындар тарапынан «Оқушылар сарайын» салу, жаңа автотұрақтар ұйымдастыру, жаяу жүргіншілер өткелдерін көбейту және суару жүйелерін реттеу секілді ұсыныстар айтылды. Бұл мәселелердің барлығы қала үшін өзекті әрі тұрғындардың күнделікті өміріне тікелей әсер ететін жайттар екені белгілі. Қала басшысы кездесуде атқарылып жатқан жұмыстарға да тоқталды. Мәселен, сапалы ауыз су мәселесін шешу мақсатында Сайрам тұрғын алабында жаңа сорғы станциясы іске қосылған. Ал Базарқақпа шағын ауданында Мәдениет үйі қайта салынды. Келесі жылы «Қазығұрт» мәдениет үйін қайта жаңарту жоспарланған. Мұндай нысандар халықтың мәдени-рухани қажеттіліктерін қанағаттандырып қана қоймай, қоғамдық өмірді жандандыруға ықпал ететіні сөзсіз. Энергетикалық және көліктік инфрақұрылымды дамытуға да басымдық берілуде. Соңғы екі жыл ішінде Қаратөбе, Еламан, Қарабастау, Жұлдыз және Жалын тұрғын алаптары газбен қамтамасыз етілді. Ал қаланың шығыс бөлігіндегі көліктік қолжетімділікті жақсарту үшін Момынов және Тіленшин көшелерінде ірі автомобиль өткелдерінің құрылысы басталды. Бұл жоба қаладағы жол қозғалысын айтарлықтай жеңілдетіп, көлік кептелістерін азайтуға мүмкіндік береді.
Еңбекші ауданында да жол салу жұмыстары қарқынды жүріп жатыр. Бүгінге дейін 57 шақырым жол төселсе, жыл соңына дейін тағы 73 шақырымнан астамы аяқталмақ. Бұл аудан тұрғындарының жүріп-тұруын жеңілдетіп, көліктік қолайлықты арттырады. Сонымен бірге 530 көше жарықтандырылып, жыл соңына дейін тағы 85 көшеге жарық шамдары орнатылады. Бұл қадамдар ауданның қауіпсіздігін күшейтіп, тұрғындардың өмір сапасын жақсартуға елеулі ықпал етеді. Көшпелі кездесулердің қорытындысы бойынша барлық ұсыныстар мен өтініштер жан-жақты сарапталатын болады. Әкімдік тарапынан әрбір мәселе кезең-кезеңімен шешімін тауып, орындалуы тұрақты бақылауда ұсталады. Мұндай кездесулер билік пен халық арасындағы байланысты нығайтып қана қоймай, қала дамуының жаңа басымдықтарын айқындауға да септігін тигізеді. Осылайша, Шымкент қаласында тұрғындардың ұсыныстарына құлақ асып, нақты істер атқарылып жатқаны байқалады. Қала басшылығының басты мақсаты – әрбір шағынауданның мәселесін назардан тыс қалдырмай, халыққа қолайлы орта қалыптастыру. Бұл бағыттағы жұмыстар алдағы уақытта да жалғасын таппақ.
