АЗАМАТТАРҒА ҚҰҚЫҚТЫҚ КӨМЕК КӨРСЕТІЛДІ
Қазіргі қоғамда халықтың мемлекет пен билікке деген сенімін нығайтудың басты тетігі – ашық диалог пен нақты көмек көрсету. Азаматтардың өмір сапасын арттыру, әлеуметтік әділдік қағидатын сақтау және тұрғындардың күнделікті мәселелерін жедел шешу бағытында елімізде «AMANAT» партиясы ерекше рөл атқарып келеді. Партияның бастамасымен жүзеге асырылып жатқан «Құқықтық көмек» жобасы осы мақсаттарға жетудің тиімді алаңына айналды.
Жуырда аталған жоба аясында Шымкент қалалық мәслихатының депутаты, «AMANAT» партиясы Әйелдер қанатының мүшесі Альбина Елшиева тұрғындарды жеке қабылдау өткізді. Қоғамдық қабылдау барысында партия өкілі азаматтардың әртүрлі әлеуметтік және тұрмыстық мәселелерін тыңдап, әрбір жағдайға жеке назар аударды. Бұл кездесулердің ерекшелігі – әрбір адамның өтінішіне формалды емес, жанашырлықпен қарауында. Қабылдауға келген тұрғындар тарапынан көтерілген мәселелер сан түрлі болды. Олардың қатарында әлеуметтік көмек сұраған отбасылар, жер телімін рәсімдеуге қатысты сұрақтар, ауызсу мен кәріз жүйелерінің жағдайына алаңдаушылық білдірген азаматтар, сондай-ақ алимент өндіру және құқықтық кеңес алуға мұқтаж жандар да бар. Альбина Елшиева әр өтінішті мұқият тыңдап, нақты жауап беріп, азаматтарға заң шеңберінде кеңес ұсынды. Көптеген өтініштер бойынша тұрғындарға бір реттік әлеуметтік көмек көрсетілді. Ал күрделі сипаттағы мәселелер тиісті мемлекеттік органдарға жолданып, бақылауға алынды. Бұл – «AMANAT» партиясының жүйелі түрде мәселенің шешімін табуға бағытталған тәсілінің айқын көрінісі. Партия өкілдері әр өтініштің артында адамның тағдыры тұрғанын жақсы түсінеді және кез келген азаматтың үнін естуге дайын. Мұндай қоғамдық қабылдаулардың мәні ерекше. Себебі олар мемлекеттік органдар мен халық арасындағы ашық байланысты нығайтады. Тұрғындар өздерін толғандырған мәселені тікелей айтуға, ал депутаттар нақты шара қабылдауға мүмкіндік алады. Осы арқылы «AMANAT» партиясы қоғамда әділдік пен сенім атмосферасын қалыптастыруға, азаматтардың құқықтары мен мүдделерін қорғауға нақты үлес қосып отыр.
Альбина Елшиева өткізген қабылдау барысында ерекше көңіл әлеуметтік осал топтарға бөлінді. Бұл бағытта партияның Әйелдер қанатының мүшелері атқарып жүрген жұмыстар да ауқымды. Олар тек материалдық көмек көрсетіп қана қоймай, әйелдердің құқықтық сауаттылығын арттыру, жалғызбасты аналар мен көпбалалы отбасыларды қолдау бойынша да жүйелі бастамаларды жүзеге асыруда. Мұндай шаралар әйелдердің қоғамдағы белсенділігін арттырып қана қоймай, олардың әлеуметтік қорғалу деңгейін де күшейтеді. Қоғамдық қабылдаудың тағы бір маңызды қыры – азаматтардың құқықтық мәдениетін қалыптастыру. Көптеген тұрғындар өз құқықтарын толық білмейді немесе қай мекемеге жүгіну керектігінен бейхабар. Сондықтан осындай кездесулерде депутаттар мен партия мүшелері азаматтарға заң тұрғысынан бағыт-бағдар беріп, өз мәселесін дұрыс шешу жолдарын түсіндіреді. Бұл халықтың құқықтық сауатын арттырып, заң үстемдігін нығайтуға септігін тигізеді.
