ЖАҢА ИНВЕСТИЦИЯЛЫҚ ЖОБАЛАР ІСКЕ АСЫРЫЛУДА
Инвестиция тасқыны толастамаған киелі Түркістан өңірінде өндіріс көрігі қызып, жаңа жұмыс орындары ашылуда. Осы ретте Түркістан облысы әкімінің орынбасары Қанат Қайыпбек Ордабасы ауданына арнайы жұмыс сапарымен келіп, дала төсінде қанат жайған ірі инвестициялық жобалардың тыныс-тіршілігімен етене танысты. Аймақ басшысының орынбасары аудан аумағындағы бірқатар іргелі өндіріс ошақтарын аралап, олардың бүгінгі аяқ алысы мен іске асырылу барысын жіті зерделеді.
Ордабасы топырағында бой көтерген еңселі нысандардың ауқымы қайран қалдырады. Сапар аясында Қанат Қайыпбек ең алдымен «Central Asia Aluminum Company» жауапкершілігі шектеулі серіктестігінің алюминий профильдерін шығаратын зәулім зауытына ат басын бұрды. Бұл жоба құрылыс майданына ауадай қажетті отандық алюминий өнімдерін ұсынып, ішкі нарықтың сұранысын сапалы тауармен қамтамасыз етуге бағытталған. Бұдан соң, қалдықсыз өндіріс қағидатын ту еткен «HUATING BIOTECHNOLOGY Co., LTD» компаниясының ірі қара мал сүйегін қайта өңдейтін бірегей зауытының құрылыс алаңы тексерілді. Мұнда мал сүйегін кәдеге жарату арқылы түрлі биологиялық өнімдер алу көзделген. Ал «KAZ KIOTI» серіктестігінің ауыл шаруашылығы техникаларын құрастыру зауыты өңірдегі диқандардың нағыз қанаттасына айналып үлгерген. Кәсіпорында қуатты тракторлар құрастырылып қана қоймай, су тапшылығының алдын алатын заманауи жаңбырлатып суару қондырғылары да шығарылуда. Сондай-ақ, бұл аймақта жоғары қысымды температурада шыны өңдейтін және өзге де қажетті бұйымдар әзірлейтін цехтардың жұмысы жүйелі жолға қойылған.
Ауданның экономикалық күретамырына айналған Темірлан өндірістік паркінде де құрылыс жұмыстарының көрігі қызып, инвестициялық жобалар бірінен соң бірі жүзеге асырылып жатыр. Мәселен, «ASIA ENERGY Co» серіктестігі күн панельдеріне арналған бөлшектерді шығаруды қолға алса, «FAÇADE COMPANY» шыны өнімдерінің өндірісін дөңгелетіп отыр. Ал «ALMEN GROUP» кір жуғыш ұнтақ шығарып, «Қарабатыр Агро» металл бұйымдарын құю ісін өркендетуде. Осы маңда газобетон блоктары мен ішкі қабырға плиталарын соғатын «Югстройтехнология», заманауи сэндвич панельдерін әзірлейтін «Alem Euro PIR», алып металл конструкцияларын өндіретін «Steel Frame» және үй мен кеңсеге сән беретін корпус жиһаздарын шығаратын «Bolashak-bal» кәсіпорындары да ел игілігі үшін белсенді жұмыс істеп тұр.
Өндіріспен қатар, өңірде жол бойындағы сервистік қызмет көрсету желісі де ерекше серпін алған. Жеке кәсіпкер «Смайылдың» бастамасымен дәмді тамақтану орны, автосервис және кең тұрақ аймағы бар үлкен кешен бой көтерсе, «M Trade–19» серіктестігі де заманауи жол бойы сервис нысанын іске қосқан. Мұған қоса, жеке кәсіпкер Ә. Әлімбековтің зәулім мейрамханасы мен «Темірші» демалыс аймағы да жолаушылар мен жергілікті жұртшылықтың көз айымына айналуда. Жұмыс сапарының соңында облыс әкімінің орынбасары аталған жобалардың әрқайсысы өңір экономикасын алға сүйрейтін маңызды тетік екенін қадап айтып, олардың уақытылы әрі сапалы іске асырылуын қатаң бақылауда ұстауды тапсырды. Ордабасы ауданында лаулаған бұл өндіріс оты жаңа жұмыс орындарын ашып, өнім көлемін еселеуге, сөйтіп ауданның әлеуметтік-экономикалық әлеуетін нығайтып, халықтың әл-ауқатын арттыруға даңғыл жол ашары сөзсіз.
